Fundman睇市：內險股博反彈首選

內地救市法寶盡出，但見股市愈托愈跌，輸到慌的股市大媽對政策干預已麻木，上周五嚴查淡倉消息，滬綜指曾經由最多跌7%變為倒升，但早市唔少股票一開跳價急跌一成停板，見反彈鬆綁貨又再湧出，大媽要錢唔要貨，最後滬綜指埋單跌5.7%，報收3,686點。累積一星期，滬綜指跌12.1%，已經連跌三星期，合計瀉掉28.6%，絕對夠晒資格入股災級跌市，A股市值短短時間蒸發近21萬億人仔。

事後孔明，今次A股大冧檔，原因之一上星期講過，泵水多時實體經濟一直無起色，同時股民對經濟復甦幻想又過分美麗，兩者落差兼過度槓桿，一跌就出現人踩人。

上星期兩融餘額減少1,900億人仔，比前星期多三倍，股民一字記之曰「斬」，爭先恐後沽貨。講到尾，另一敗筆之處是阿爺對市場預期管理，實在信心爆棚到有點自負，以為可以透過中證監加強兩融規管，做到溫和調節股市之效，忘記A股向來一放就亂一收就死的特質，結果最後一根稻草一壓下，多多政策都托唔住。

周五收市後先來三招托市，人行通過向14間金融機構開展中期借貸便利（MLF）操作2,500億元人民幣，期限六個月，利率3.35%，繼續流動性管理灌水浮股。此外，即減IPO數目並擴QFII額度，避免新股上市活動抽走游資，提高外資基金入市便利。

淡友迴避合情理

三係批准中國保監會基金，預計規模3,000億元人民幣，投資向主要圍繞國家產業政策，好似「一帶一路」、京津冀協同發展、長江經濟帶等戰略項目等，阿爺被炒家牽着鼻子走，政策早就流傳，周五晚夜期毫無反應可見。

可能因為咁，周六又再投擲來救市核彈，阿爺揼廿一間券商心口，4,500點樓下挾錢掃至少1,200億人仔A股ETF，跟手叫停晒所有IPO，就連已經收錢的都要退，干擾手法是史無前例咁粗暴，今次信定唔信？小弟相信今次點都會有多少威力，話就話1,200億人仔唔夠A股兩市一日成交額一成，不過真金白銀入市干預先例既開，唔得加碼變得理所當然，如果真係有阿爺口中的刻意放空淡友，等你彈到上4,500點再做過亦合情合理。

今次券商入市，限制只買ETF，重磅指數成分股會最受惠，過去兩星期因為唔少A股一開跌停，基金斬無可斬，都揀成交深度夠，且與A股市場升跌關連性高的內險開刀，一旦買番轉頭應是博反彈首選，順序以平保（02318）較合眼緣，其次係國壽（02628），冷選太保（02601）。

新經濟股諗得過

再延伸落去，救市萬一成功，把過去三星期恐慌逆轉咁巴閉，近排因為紅色熱錢撤離，隊到過晒火位的新經濟股，貪佢哋炒味濃彈力夠，都可以諗諗，補完裂口的阿里健康（00241）及阿里影業（01060）外，金山軟件（03888）、金蝶（00268）等近排落價落得好勁嘅，都可以睇睇。

執筆時希臘公投進行中，而周末時民調依然吃緊，未有任何一方取得較大優勢。不過，英國賭波公司盤口所見，支持債權人方案賠率熱到1.4倍，反之say no的有1.75倍，開盤大員感受到，口裏說不、行為老實的人類習性。事實當ATM連歐元廿蚊紙都光，每人每日提款上限因此由60歐元跌到50歐元，過多幾日，唔知銀行仲有無歐元現鈔應市，希臘人最終怯於恐懼下屈服，機會仲係較大。債權人都夠寸嘴，講明就算公投答案say yes，之前條件都要重新傾過。

不過，由歐元兌美元近期守住1.1算，看來匯市已睇通睇透，認定今次希債危機，心理影響大於實際。