Fundman睇市：渣打可適量儲貨

平時無乜人理的滙豐香港採購經理PMI指數，由九月的49.8撻落十月的47.7，惡化速度是一一年以來最快，市場解讀係佔領行動令各行各業出現放緩迹象所拖累。實話實說，九月二十六日佔領行動爆發之前，恒指在23,678點水平，經過個幾月時間，仲累積咗17點進帳，到底數據係反映受訪企業高管杞人憂天，抑或係股市大孖沙過分樂觀？大家自行判斷。

阿里巴巴在紐交所愈戰愈勇，前晚升4.1%，收報106.07美元，創掛牌以來新高。本地基金在炒無可炒下惟有追騰訊（00700），推高股價1%，收報124元，成為貢獻指數最多藍籌。可惜濠賭彈完又再跌過，加上一堆中資股走勢麻麻，兩桶油、內銀及中移（00941）全線腳軟，個市明顯無咗牽頭板塊帶動。

內地數據水分多

今年唔少本地股票基金都出現贏唔多、輸唔死的悶局，滿以為年尾有滬港通炒吓幫幫條數，點知最後好夢又落空。老實講，睇見八月全國發電量出現負增長、工業生產附加值跌到衰退臨界點邊緣，話唔驚祖國經濟硬着陸就假，偏偏人行條頸鐵咁硬，死唔肯由微刺激轉為強刺激，全面降準同減息，大孖沙對中資股有所戒心，是可以理解。

本來，第三季中國GDP落到去7.3%，已經唔算標青，尋日史提芬亦提過，話已經發布第三季GDP的內地26個省市，合計GDP毛額條數居然大過官方全國數字，可見地方政府灌水情況之嚴重。啱啱國統局話今年底明年初，將會開始推國際標準修訂的GDP核算方法。在保增長大前提下，很好奇在現時的敏感時刻，若然真係如實報數的話，投資者會唔會受唔住？

從投資角度出發，短期如果無滬港通，人行又唔肯跟大圍，讓中國進入新一輪寬鬆貨幣周期，短期中港股市要出現明顯突破，相信並唔容易。

跨國銀行難搵食

滙控（00005）以及渣打（02888）季績曝光後，股價向下。今日跨國銀行生意唔易做，史提芬有朋友在私人銀行部門工作，話依家新客凡係揸美國、中東護照，又或者有生意響澳門，開戶都可免則免，事關依家歐美監管機構諸多抽秤，搵藉口罰錢發晒窮惡，唔少大銀行下面的私人銀行部門，老早發指引話情願少做少錯。

在環球去槓桿化、炒房又搵唔到食底下，業績麻麻是意料中事，最唔明朗反而是死唔斷氣的調查及罰款。好似滙控仲畀英國金融業操守監管局咬住唔放，就外匯交易業務展開調查，結果未知。另一邊廂，市傳美國司法部及曼哈頓檢查官員，都重新展開對渣打調查，從渣打股價表現，看來再樂觀捧場客，都開始失去耐性。

君可見金融海嘯最惡劣時，渣打最低曾落過0.83倍PB，而一四年PB只係得0.78倍，即係仲衰過海嘯期。不過，以其永續債券約4厘水平，一四年股息有5.6厘，個人認為股市錯價的可能性唔細，唔怕坐的話，可以酌量儲番啲。