港股受制於24,000點關，尋日繼續調整，恒指連續三個交易日低收，主板成交得六百幾億。雖然沽壓不算太大，但好明顯反彈逾千點過後，魚缸缺乏炒作主題，投資者暫時都選擇按兵不動。

財險供股雖令市場感意外，但其質素仍為內險股首選。（資料圖片）

尋日提及的長城汽車（02333），微跌0.28%，收36.05元，同類股大部分亦以整固為主，其中比亞迪（01211）表現較弱，低位曾見46.8元，收報47.25元，跌1.25%，唔爭在觀望250日線45元水平承接，再決定是否入場執平貨。

油價受壓，三桶油冇運行，加上濠江賭業數據欠佳，濠賭股全線大飯茶，是本地魚缸近日跑輸外圍的原因。建議暫時先將焦點放在個股，避開重磅股或指數相關衍生工具，以免一旦做錯邊，贏三鋪唔夠輸一鋪！

華彩走勢勇有睇頭

尋日升幅榜唔少係比較生面口的二三線股，如敦沛金融（00812）、北海集團（00701）、中國飛機租賃（01848）等。見彩票股華彩控股（01371）表現甚勇，成交大增至3.29億元，短線回吐守穩0.8元樓上，應該仲有得去！

企業融資消息吸引缸邊友目光，近三個月反覆炒高的深圳國際（00152），炒到上12元樓上便宣布配股集資，尋日股價落番11.42元，跌4.99%。

自深圳話要大搞前海，深國作為該市旗下窗口公司，未來要配合大計發展區內物流業務，在在需財。年初搞十合一變成大價股，相信正係為吸引基金入局作鋪排，如今炒高一浸宣布集資，長情股東應該視為好消息，皆因顯示班老總們真係有心做大事，股價表現自然值得期待。

中國財險（02328）亦突然宣布供股集資，股價一度低見13.54元，收報13.82元，跌2.5%。翻查資料，財險去年才進行過供股，而去年度每股派息按年增加一倍有多，如今卻又再傳來伸手消息，真係令小股東費解！但若然唔供，又要眼白白睇住持股被攤薄，相信連基金股東都頭痕。不過，財險係現成內險股中首選股份，加上本身經營表現唔差，照計最終大部分股東還是選會擇乖乖科水！

走勢上，尋日股價失守10日及50日線，惟13元水平乃近兩個月的主要支持位，若然消化供股消息後未有失守，後市仍有機會向上試衝主要阻力位15元關。