上季港島區7個指標甲級商廈受滬港通帶動，交投有回升迹象，期間買賣交投量及成交金額按季同樣大升約兩倍。不過，十月份佔中事件爆發，該批商廈加埋都只係錄到1宗成交，幾乎全部「食蛋」。市場人士話，投資者及用家因為佔中事件，入市態度轉為觀望，相信第四季港島主要甲廈買賣成交會較上季少。

十月份佔中事件爆發，買家觀望，港島區甲級商廈市況逆轉。（資料圖片）

港島七大指標商廈今年成交表現

劉Sir收到代理所畀嘅資料，發現上季港島7個指標甲廈，包括金鐘力寶中心、美國銀行中心、遠東金融中心、海富中心、中環皇后大道中9號、灣仔會展中心，同埋上環信德中心嘅交投量，都明顯多咗。

季內錄到約15宗成交，較第二季只有5宗飆升兩倍，成交金額亦由第二季嘅超過2.3億元，升到第三季嘅逾7.07億元。

上季當中，以海富中心錄約6宗成交最活躍，全數都喺九月份錄到，成交金額共逾1.57億元，該廈第一及第二季成交就「食蛋」。其次係信德中心，季內錄約4宗成交，涉額共逾1.97億元，按季多1倍及1.66倍。

不過，十月份佔中爆發，7個指標商廈買賣交投幾乎全部「食蛋」，只係錄到1宗力寶中心2座低層22室，以呎價18,800元成交，情況反映因滬港通帶動的轉旺的商廈市場，被突然出現的佔中打殘。

廖偉麟：商廈呎價落後

中原蔡德寶同劉Sir講，上月商廈市況低迷，買賣交投「食蛋」，主要是受到佔中影響，短期內投資者嘅態度轉趨觀望。

佢又話，相信今年第四季交投量，未必可以高過第三季。

紀惠廖偉麟亦話，依家整體商廈呎價升幅仍處於追落後水平，加上市場預期未來會加息，相信投資者及用家會趕在加息前入市，料交投會增加，呎價有一至兩成嘅升幅。

太子珠寶擬收旺角舖

另一方面，旺區靚舖難求，部分業主寧願收回舖位自用。

太子珠寶鐘錶鄧鉅明尋日同劉Sir講，將會喺明年四月底等本地時裝連鎖品牌約滿旺角西洋菜南街單邊舖後，連同隔離嘅3個分別由鐘錶同藥房租用舖位，將會一併收回自用，而該批舖位依家月租約215萬元。佢話係集團長遠希望在每個區域都有旗艦店。

此外，劉Sir又收到風，太子珠寶鐘錶積極擴展商場新據點，近期分別喺旺角同元朗預租各一個商場巨舖。