今時今日炒股票要非常嚴謹才有機會贏，昨日一早判斷周二晚美股氣氛偏好，如果當時買道指期貨，可以無風無浪贏一百點，貪方便改買恒指的話，就要輸百幾點，一來一回完全是天堂與地獄。又例如星期二買A50要捱，滬深300則頂得住，所以已經不再是以前那種唇齒相依的世界。

這種現象是合理，因為剩下來的投機者都是久經歷練的高手，絕不苟且，性質相近的資產，只要有少許分野，帶有瑕疵的表現是可以遠遠落後，正如昨日的恒指及A50。

內銀領跌有啟示

既然有新秩序，便惟有適應，要買恒指，倒不如如日前所講，打散注碼買藍籌四強，避開中資金融股及香港地產股，事後證明的確好好多。內銀股昨日在A股市場領跌，人家擺明有滬港通可以憧憬，一樣不領情，反映出這個板塊有甚大問題，至於長實（00001）進軍飛機租貸，潛台詞其實是睇淡中港地產，亦難怪本地地產股會受壓。

不過，滬深300指數頂得住，也是證明A股整體投資氣氛並不差，始終要信基本面方面是有改善，大板塊勢弱不一定是問題。

絕對應該戒手痕，減少甚至完全放棄香港期指，藍籌股一半好一半衰，兩面拉鋸開大開細都OK，而且市場深度又差，隨時忽然突襲，可以輕易升跌一百幾十點，幾乎接近毫無章法。睇港股還是死心不息睇恒指的話，不如算了吧，代表性實在太低，至於繼續炒港股炒期指，則和賭大細無分別。