八月推介過嘅中國飛機租賃（01848），股價眨吓眼由6蚊變9蚊，尋日即市一度挾到去8.9元，創咗上市新高，埋單仍升10.2%，收報8.72元，見佢幅圖夠靚，下站阻力上移到9個半，支持喺7.8元。

中飛租主攻內地飛機租賃市場，可將承租客戶的租賃應收款項包裝為信託產品，上半年純利增長超過四成至6,283萬元，期內公司獲交付9架飛機，令機隊規模由25架，增至34架。

今年公司目標係增加15架飛機，一六年底增至最少64架，八月就斥資3.7億美元買咗4架A320飛機，兼向成都航空、四川航空分別租出4架及2架飛機。

睇番尋日爆上原因，原來周一有消息指空中巴士正與中飛租洽談大約一百架A320飛機訂單，涉及金額90億至110億美元，若然成事，成單刁唔嘢小！

而咁啱得咁橋，長實（00001）亦都話要拓展飛機租賃業務，剛向獨立第三方以18.9億美元掃咗45架商務客機、及以1.3億美元收購15架飛機六成股權，足證連超人都睇好其行業投資價值。