Fundman睇市：華電估值仍吸引

尋日恒指再升299點，收報23,819點，兩日加埋升676點，轉倉轉到八八九九的十一月期指升267點，收23,835點，高水16點，大市主板成交796億，是十月以來最多，睇嚟九月初開始級級落的港股，轉勢味道極濃。

收市後，交行（03328）派成績表，首三季純利515.22億元人民幣，升5.7%，單計第三季則賺147.49億元人民幣，增長6.3%。業績稍好過大行估計，首九個月淨利息收入升4.86%，但淨利息收益率按年收窄13個點子至2.4厘，淨手續費及佣金收入升17.8%，截至九月底的一級資本充足率11.1%。一如其他內地銀行，經濟增長放緩下資產質素變差，首三季貸款減值損失165億元，升23.6%，不良率升至1.17%，撥備覆蓋率下滑但仍是相當高的2.01倍，撥備率2.36%。

內銀可放心捧場

該行預期，信貸質素轉差的情況，會由民營中小企業擴散到中大型企業，且向中西部蔓延，但姑勿論如何，近排內銀強勢，除咗係因為四大行輪流發優先股補充資本，利好氣氛外，唔少分析開始賭緊，在內地通脹落到四年半新低下，人行遲早跟隨美日以貨幣政策刺激經濟，減息之日唔會等好耐，常言道buy on rumor sell on fact，醞釀出招之初，內銀股點睇都唔衰得去邊，可以放心繼續捧場。

新奧（02688）被插爆，事緣公司向大股東夫婦以合共2億美元收購北美33個燃氣加氣站，尋日股價最多跌一成四，落到46.7元，搞到市值最高峰唔見82億元。呢單2億美金，相當於15.6億港元的交易代價真係大。

新奧交易代價大

上市公司同大股東買嘢，從來吃力不討好，實畀其他股東用顯微鏡𥄫到實，尤其新奧賣點一向係內地管道燃氣市場的美麗前景，突然隔山買牛，搞細細單收購，且相關加氣站舊年仲蝕緊逾2億人仔，今年首三季仍未扭虧，成單嘢自然難脫套現之嫌。

客觀睇，新奧明年預期核心業務賺26.5億人仔，蝕得起有餘，但問題係收購協同效果唔高，交易又激嬲基金經理。純睇圖，年初47.3元低位不宜失守，否則麻煩。

今年史提芬的心水之一華電國際（01071），業績對辦，首九個月純利42.51億元人民幣，按年升45.4%，同期發電量134.83百萬兆瓦時，升3.79%，上網電量126.32百萬兆瓦時，升3.84%，盈利增長主要來自煤價下跌，單位燃料成本下跌11至12%，跌幅較華能（00902）同期的6.3%大。

昨日華電股價抽升，與大行重估有關，內地政府睇嚟堅定唔走粗放型經濟回頭路，近日國際大宗商品價格已疲憊不堪，煤價近期反彈好可能只係曇花一現，今年華電股價累積升八成四，但目前估值仍是6.8倍PE及5.53厘股息率，仲係好吸引。