夜期加時 做定功課

究竟甚麼類型的投資者愛炒夜期？駿溢期貨業務推廣董事兼投資班導師郭樹鈿稱：「夜期可保日期嘅不足，配合外圍走勢變化。我每晚教完堂，喺大約夜晚十點三就會即刻觀察夜期，睇吓日間做落嘅倉位需唔需要補救，如果有200至300點利潤就會平部分倉鎖定利潤。」

先做淡倉翌日高沽

他舉例，近期外圍慣性跌得狠，拖累夜期出現低水，但往往恒指翌日開市又會高開，所以他近期投資期指的策略是先做淡倉，並於夜期時段趁低水平倉，待翌日恒指開市就趁高開沽貨。

近期每日夜期成交張數，已由早前約數百張升至四千多張，但跟日期的成交張數仍差天共地，故當前炒賣夜期仍是小圈子遊戲！郭樹鈿稱：「喺日期時段，大期同細期會比較貼價，但係夜期就會有偏差，而且夜期『死穴』係買賣差價大、成交張數少，所以好難做到套戥對沖，亦唔啱玩超短炒，只可以波段性咁炒，一旦捉錯路嗰陣止蝕成本都會高咗！」

他又稱，在期指世界依賴技術指標投資，容易令股友高買低沽，可以說是輸面極高！炒期指尤要跟大勢，以日線圖做輔助，在較阻力位高時沽、較支持位低持貨；預測趨勢就要學睇升段、跌段、調整、反彈，例如跌多升少，即反覆向下，要以沽為主！

睇數據避大戶挾倉

事實上，被大戶挾倉一向都是令散戶炒輸的十大慘事之一，究竟有甚麼方法避開？香港財經資訊及教育研究部主管潘玉琪指，散戶不妨可參考成交均值（VWAP）或估計結算價（EAS）這類數據，除有助避開大戶挾倉，亦可以藉此考慮應否持倉過夜。

若期指走勢偏離成交均值，或反映有大戶挾倉。若收市價遠高於成交均值，翌日股市會裂口高開，形成單邊市；若收市價遠低於成交均值，翌日會裂口低開；若收市價貼近成交均值，則翌日市況會傾向牛皮，這個指標訊號準確機率八成，投資者宜掌握。

散戶心得：軟件分析 拒炒即晚

任先生：「我喺九八年轉玩期指，十幾年嚟都係靠數Cycle（周期）嘅方式計算值博時間同價格。有套叫PhiMatrix 嘅軟件係幫手分析嘅入門工具，我無咗佢唔得o架！且只係索價廿幾蚊美金。我每星期只係喺夜期落盤一至兩次，主要係用嚟平倉或開倉，唔炒即晚。另外通常每晚都會Set定盤，每當出現約300點溢價或以上就會自動掃貨，期間我會照去街或食飯，間中用手機Mon住。」

散戶心得：兩大策略 先攻單邊

馬先生：「我多數都係玩日期，好少玩夜期，因為夜期買賣差價大，賺埋賺埋都唔夠，對我哋唔着數。依家主要有兩大策略去玩期指，首先係『做單邊』，只集中睇升市或跌市，睇單方面嘅趨勢可以令我哋個心定啲同集中啲，更加重要嘅係可以減低風險，防止畀大戶挾。至於另一個策略就係做『牛熊盤』，一早定好個止賺、止蝕位，Set好咗就可以有電腦幫手，有咩事可以自動幫我Cut，減低風險。」