上述灣仔汕頭街1及3號舊樓以6,580萬元登記成交，不出劉Sir所料，新買家係銳意喺灣仔區大展拳腳嘅合和。

合和近期積極收購灣仔區內舊樓，未來勢帶旺該區住宅或商廈發展。(資料圖片)

合和實業 灣仔項目新動向

睇返公司註冊處資料，買家偉隆資源有限公司嘅董事禤寶華，係合和今年委任嘅公司秘書，公司登記地址為合和嘅總部寫字樓所在。

劉Sir知道，合和近期不斷擴大灣仔區版圖，今年五月就向土審處申請強拍區內市值逾3億元嘅皇后大道東161至167號一列舊樓，計劃發展全新寫字樓。

而翌月，合和就以2.388億元投到灣仔捷船街迷你住宅地，每方呎樓面地價16,034元，仲創埋同區新高。

羅便臣道銀主嗌低3成

舊樓重建有價有市，大鴻輝就旗下上環干諾道西99至103號酒店項目，其中101及102號地盤向土地審裁處申請強拍，劉Sir睇過入稟狀資料，申請人持有物業97.6744%業權，估值約莫2.6億元。

劉Sir發現，近排市場銀主盤真係愈來愈多，有啲仲不停調減開價吸客，好似卓先拍賣行下個禮拜三再次拍賣嘅西半山羅便臣道1號三層複式戶，比起上次再減多100萬元，開價6,700萬元。

上述單位開價至今已經累積減咗約31.6%咁多，同場屯門星堤2座低層G室連車位的銀主戶，都減咗約10萬元，以970萬元開價拍賣。

萬宜漁村投資回報5%

另外，市場出現最新銀主放盤，荔枝角盈暉臺1座高層A及B室同埋九龍城御．豪門低層B室，叫價分別約1,035萬及約1,250萬元。

至於忠誠拍賣下月推拍嘅政府產業署物業11個西貢萬宜漁村單位，該行職員話，物業噚日首度開放參觀，有約20組準買家到場，投資者佔一半，佢話該物業回報率超過5%。呢批單位開價共1,600萬元，平均每個大約145萬元。