港股在期指結算日先升後跌，恒指收報24,741點，跌177點，主板成交804億元，多達1,125隻股份下跌，真係有點「災」味！連續兩日高開低收，基本上已確認大市暫未有足夠動力闖更高水平，調整開始。

海爾銷售規模龐大，故盈利增長不及同業情有可原。（資料圖片）

綜合券商預測海爾業績（人民幣）

太陽日誌

展望九月份，魚缸焦點不離阿里在美上市，以及關於滬港通及國企改革等消息。滬港通兩地市場參與者系統測試至今進行順利，相信九月份兩地市場參與者都會加大客戶推廣力度。不過，相信初期內地股民對港股通興趣未必太大，皆因早有渠道參與買賣。反而，滬股通應是焦點，畢竟「中國故事」仍為不少境外投資者所嚮往。

藍籌股中，中移（00941）呢兩日表現強於大市，而中電信（00728）公布完業績亦連升兩日。查實中電信係三大業者中，4G網投資最落後的一員，未來要趕上，資本開支龐大。三大合組鐵塔公司，有助紓緩投資4G業務的資本開支壓力，只是短線股價升到上呢啲位再上水位未必太多。

魚缸水位尚處高位，企業都把握抽水機會。石藥（01093）停賽，據講係母公司沽貨減持，呢啲時候唔做更待何時？內房碧桂園（02007）15供1，集資30多億元，用作再融資同一般營運資金。查實唔少內房都想抽水，問題係中小型業者風險太高冇基金吼，反而類似碧桂園呢類較大規模且有大孖沙坐鎮的房企，仲有條件做吓。

企業抽水潮再現

今次碧桂園唔揀批盪而係供股，算係畀全體股東優先參與公司增資擴股的機會。雖然今次供股比例唔大，但小股東聽到公司要攤大手板，一般第一個反應都係唔多高興，昨日股價曾跌至3.36元，並不意外，惟已大概反映供股因素。

阿里九月登場，理論上又可以關注吓相關概念股，但指數見阻回落，選概念股的同時，還是要多睇重基本因素，才能抵得住大市波動。同阿里合作搞物流業務的海爾電器（01169），前日公布中績賺9.78億元人仔，增長18.9%。相比起近日公布中績的家電股如匯銀家電（01280）同國美電器（00493），盈利增幅係有點遜色，見當日海爾股價跌6%，昨日則反彈2%，收報21.95元。

不過，其實海爾的銷售規模大得多，半年銷售額經已有329億元人仔，半年盈利實現雙位數增長，都唔簡單。反而海爾的渠道綜合服務業務收入增長穩定，並有助提升整體毛利率，在這方面的成績，是其他家電股望塵莫及的。

到底阿里喜事近，相關股份會唔會乘機起舞，仍要拭目以待，但即使純以基本因素及估值出發，海爾係值得中長線投資者捧場的大型消費類股份。