香港居住環境擠迫，近年對儲物空間需求有增無減，迷你倉成咗新投資機會。高力國際一份報告預計，市場對迷你倉嘅潛在樓面需求高達1,230萬方呎，遠遠超過咗目前供應量280萬方呎嘅4倍，若果租個兩萬方呎嘅工廈搞迷你倉，投資九年就有高逾30%回報率咁話，而最具發展潛力地區係沙田同荃灣區。

高力盧永輝（左）指出，市場對迷你倉認受性提高。右及中為嚴國樑及趙偉雄。

該公司亞洲研究及諮詢行政董事盧永輝同劉Sir講，市場對迷你倉嘅認受性已經提高咗好多。

成本千萬 四年半回本

而該公司研究及諮詢經理嚴國樑話，目前全港有約82萬家庭住喺無儲物房嘅單位，如果入面有一半家庭需要30方呎嘅儲物空間，需求就高達1,230萬方呎，係供應量嘅4倍。

該公司工業服務部高級董事趙偉雄話，如果以租用一個樓面兩萬方呎工廈作迷你倉計，連同租金、裝修費、閉路電視、保安及冷氣系統等設施，迷你倉所需成本約1,000萬元，回本期差唔多要約四年半，回本期較長。

他建議營運商可以同工廈業主傾下聯合經營，咁就可以有較長租用期保障，如果以九年租用期計算，回報率就有逾30%。相反，購入工廈經營迷你倉雖然可以避免租約期太短嘅風險，但回報率就相對只有約15%。

趙氏話，依家觀塘區迷你倉供應嚴重不足，又指沙田及荃灣區將成迷你倉潛力發展區域。據該報告資料，現時觀塘區迷你倉供應量約46.5萬方呎；沙田及荃灣區則分別約45萬方呎及25.5萬方呎。

他指，個別行業對迷你倉有很大需求，如銀行及律師樓，現有銀行正洽購工廈作迷你倉用途。他續指，現時港島區迷你倉呎租最高，每方呎約70至80元；九龍區及新界區呎租約30至50元。

屯門華樂商場研拆售

另外，市場再有劏舖及車位拆售，美聯梁國文話，早前由佳寶集團以3.4億元買入嘅屯門華樂大廈地下及1樓商場，將會拆售多個舖位，但就未知具體詳情。

資深投資者蔡志忠話，旗下北角英皇大道廣場已賣約七成舖位，尚餘單位有機會喺下周加價5至10%。利嘉閣葉斐明話，荃灣金熊工業中心共89個私家車及貨車車位，喺過去兩周低調開售，依家賣逾一半車位，套現5,700萬元。