Fundman睇市：A股追落後水位足

滬港通主題炒唔停

近期炒作題材包括國企改革、房地產鬆綁及滬港通等，前者及後者都有很大幻想空間，至於鬆綁是否等於樓市得救？未來房地產銷售量及售價自有答案。滬港通呢個主題應該不離事前炒作、事後散水，券商股仍然炒唔停，如信達國際（00111）、天行（00993）及華富（00952）等都升幅逾一成。

滬綜指昨再升1.38%，創八個月新高，有統計話外資流入創○八年四月以來新高，而資金來源是發達國家股市。近期歐洲股市的確較差，第三大經濟體意大利技術上陷入衰退，歐盟同俄羅斯互相制裁累鬥累，而中國經濟此時轉好，資金移情別戀並不為奇，泊在中港股市多兩個月，然後再作部署。

滬港通之好處是可直接投資A股，但近期最熱門係兩隻A股ETF──南方A50（02822）同安碩A50（02823），可以解釋為投資者已等唔切滬港通，趁近期內地經濟數據做好而追捧；亦可解讀為投資者偷步，希望在滬港通前先飲頭啖湯，等正式開通時就高位出貨。

不過，A股ETF最大好處係唔使傷腦筋，滬港通等於多咗幾百隻新股，連基金經理也難消化。但當可直接投資A股之後，ETF能否保持3%以上溢價頓成疑問，而買輪雖然槓桿比率高可以小博大，但要再畀多一成以上溢價。如覺得滬港通揀A股太費精神又嫌ETF溢價過高，較簡單可買內銀股（直接分享經濟增長成果，並佔中國股市整體盈利逾一半），或買內險股（受惠於股市升幅）。

阿里勢再掀新瘋潮

無可否認，A股呢排確氣勢如虹，原因除咗滬港通外，近月內地經濟數據相當標青，無論PMI、發電量、M2及出口等均反映經濟復甦，周六公布之CPI亦相當溫和，外資大行慣常留下一句評語：為貨幣政策提供寬鬆空間，雖然明知全面寬鬆的機會微乎其微，但經濟復甦 + 低通脹 = 股市上升，美國炒呢條方程式已有兩三年，現在輪到A股追落後。

如無意外，阿里巴巴九月份在美上市，此前其一舉一動都受市場關注。消息指最近阿里為咗讓旗下商城能吸引更多名牌進駐，故主動聯絡名牌公司，如在其商城設店，將盡最大努力將商城內售賣的冒牌貨品商戶清除。用呢招既可自抬身價以便在上市時爭取更好的估值，又可清理專售冒牌產品的商戶，以防為上市審批添變數，都幾有諗頭！

展望下半年，除咗阿里之外，據講南韓的LINE亦計劃期間在美上市，估值超過100億美元，會唔會被阿里飲咗頭啖湯，不得而知，但若然市場冇特別重大不利消息出現，兩家大型科網企業排隊登場，下半年科網股再現炒作熱潮仍值得期待。