樓市出更：灝景灣車位 4個月5破頂

數數手指計吓，灝景灣車位喺四個月內竟然五度破頂，睇嚟要幫部靚車搵個安樂窩都唔容易。

美聯梁岳宏話，青衣車位價格升唔停係有原因，事關青衣機鐵站商場加建，部分車位停止續租，令到區內車位突然變得搶手。

佢哋公司最近就連環做咗兩宗灝景灣車位成交，其中一個L2層單號車位，以約156.8萬元售出，破盡屋苑車位價格紀錄，買家購入自用，至於另一個車位為L3層雙號，就以約150萬元成交，買家為投資者。

回報3.4厘 引投資者

佢又話，係家市場只剩低1個車位賣盤，叫價逾160萬元。灝景灣現時車位月租約4,000至4,200元。

若以車位價約150萬元計，租金回報率約3.2厘至近3.4厘，其實都算唔錯，難怪車位價咁高都有投資者承接。

灝景灣車位四個月已五度破頂，四月時一個L4層單號車位以135萬元新高價賣出，到月底紀錄由L1層單號車位以136.8萬元打破，之後再有車位以138萬與145萬元賣出。全區紀錄保持者仍係盈翠半島，七月有車位以159萬元登記賣出。

一手熱賣 海典清倉

除咗二手車位之外，一手車位近期去貨速度都唔錯，好似信置（00083）喺過去嘅周末就賣出多個車位。

其中，奧運站維港灣及烏溪沙銀湖．天峰各沽出2個車位，至於火炭御龍山及馬鞍山海典灣亦各沽出1個車位，當中海典灣的車位經已悉數沽清。