港股經過上周調整後，市底支持顯現。雖然外圍不乏利淡消息，但阿爺撐住半邊天。內地七月份經濟數據符預期，A股尋日再現升勢，港股跟升，恒指全日高位見24,671點，收報24,646點，升314點，只是總成交僅667億元，後市要突破25,000點，必須要有大成交作配，而若然真係有大成交挾穿25,000點關，後市就唔會止步於此，故奉勸淡友唔肯轉身都唔好盲目加沽，以免恨錯難返！

去年深圳國際的物流服務業務增長不俗。（資料圖片）

深圳國際（00152）

綜合大行預測深國業績

阿莊100萬元投資組合

手遊股可小注投機

科網類股份又再蠢蠢欲動，騰訊（00700）股價一度逼近52周高位，阿里巴巴上市前股價繼續尋頂係正路推想。手遊股IGG（08002）中績由虧轉盈賺3,290萬美元，消息帶動股價升近三成，收報5.47元。不過，其實期內主打遊戲增長有所放慢，但公司轉盈兼派中期息，暫時抵銷了相關疑慮。受消息帶動，博雅（00434）升10%、雲遊（00484）亦升5%。

阿莊都係覺得，沾手手遊股要抱投機心態，要一齊蒙着眼睛鬥癲先好玩，睜大眼計數斷秤就會卻步。所以，若然未來一個月板塊氣氛轉熱，小注跟玩無妨，但也要提防阿里上市前後的一次升浪會係又一頂峰。

引入民資締造雙贏

今期魚缸另一大主題乃國企改革，消息指廣東省新一輪國企改革方案將啟動。而省國資委官員表示，廣東將持續推進混合所有制經濟改革，目標在一七年混合所有制企業數目佔比超過六成。講白啲，其實在國企改革過程中，國企最憂慮係國有資產流失，而民企則關注退出機制，但在改革的大洪流下，藉改制引入競爭，提升效益，係大勢所趨，上市國企透過引入民資實現產業轉型升級，自可創雙贏面。

過去廣東一向係內地改革的先驅，到底一批隸屬廣東及深圳的紅籌及H股公司，將於省國企改革中擔當甚麼角色，值得關注。投資市場往往先行一步，呢個大題材似乎已吸引資金落注。尋日剛宣布新項目的深圳國際（00152）股價升4%、粵海置地（00124）升6%、深圳控股（00604）升2%、粵海制革（01058）升7%、廣南（集團）（01203）升10%。

講到深國，咁啱被摩笛睇中，大摩報告話估佢未來三十日有七至八成機會股價上升。阿莊都唔止一次分析深國，過去兩年其股價維持在8.5至11.5元上落。無論抱炒上落心態抑或中長線持有，呢隻都係實實在在的優質股，只在於看官夠唔夠耐性。尋日股價異動，平均成交價都要10.04元，短線小注一試亦無妨，先博上橫行區頂部，主要支持在9.5元。