Fundman睇市：汽車股生意難撈

近期主調仍係滬港通，兩隻A股ETF再進佔成交金額首兩位，券商股炒得極瘋狂，信達國際（00111）再升26%，三日升七成好易發達，連班本地薑如華富（00952）、匯富金融（00188）、昌利（08098）等都追落後，時富投資（01049）掛個名亦升14%。滬港通係唔係咁好搵，要到時先知，但老行尊早就話本地券商或有被中資券商搶生意之虞。

「還利於民」有目的

發改委確認12家日本車企價格壟斷，但今次唔係針對日本企業，因為幾間歐洲和美國車廠亦面臨受罰。反壟斷調查最轟動係去年的奶粉「迫降」事件，曾拖累合生元（01112）股價大跌。中國打正旗號要暴利行業「還利於民」，不過，背後目的可能是爭取籌碼，就如早前調查高通，對方立即與中芯（00981）合作推28納米晶圓製造；而外國車廠近年在華賺個盆滿缽滿，但技術轉讓就相當吝嗇。

外國車廠見風頭火勢，紛紛先行減價，包括捷豹路虎、奔馳、奧迪及佳士拿等，估計寶馬將是下一個跟隨者。不過，合資與本地車廠未必係得益者，進口車減價，意味與本地品牌價格差距收窄，本地車市佔率流失問題將更嚴重，睇長汽（02333）、吉汽（00175）及比亞迪（01211）今年上半年業績已有啟示。

至於汽車代理商或更慘，因為車價跌咗，就算毛利率能夠維持，亦代表利潤減少，但若銷量因而增加則可彌補；近年汽車代理商積極發展售後服務，但外國車廠眼見賣車利潤減少，亦會加快向售後市場轉移，逐步推出網上售後服務，對4S店構成競爭。近年汽車代理股在香港上市愈來愈多，同是以拓展銷售點為賣點，但招股反應冷落，潤東汽車（01365）只能以下限定價。

中國搞反壟斷就如「只許州官放火，不准百姓點燈」，連完全開放的汽車市場都要管，但多個行業卻由國企壟斷。雖然今年開始玩國企改革，又話玩混合所有制，惟結果甚少民企參與，變成國企轉讓股權給國企，市場流動性短缺，民企想吞亦吞唔落。

重組概念持續升溫

央企重組進行得如火如荼，中信集團以中信泰富（00267）借殼上市，光大集團重組方案獲批，見母公司重組或整體上市方案落實後，香港上市旗艦公司股價多數可以受惠。中信泰富近日股價展強勢，而近日光大控股（00165）表現亦明顯轉強，昨日收市升7%，收報14.26元。

紅籌股炒作重組概念似乎逐漸成為潮流，近月確實見多咗資金入場押注。昨日不乏逆市上升的紅籌股，如粵海投資（00270）及香港中旅（00308）分別升5%及升3%。中糧系亦見異動，中國食品（00506）及中糧控股（00606）分別升5%及4%。理論上，上海實業（00363）及同系的上實城開（00563）表現算係相對落後，但究竟係咪問題連「上海」兩隻字都炒唔起，就當史提芬懶動腦筋，留待大家估下！