隔晚外圍低收，港股尋日跟隨低開後，恒指最低見過24,397點，惟其後A股僅微跌收場，港股跌幅亦收窄，收報24,584點，跌64點，10日線失而復得，大市總成交702億元。繼續以調整市看待，反正A股唔肯大回，港股亦有藉口高企。

近兩年海通證券的盈利表現不俗。（資料圖片）

滬港通在即，加上消息指內地擬放寬券商資本要求，券商股備受捧，細價股仲升得狂野過大價股。好似尋日跌市，第一上海（00227）及申銀萬國（00218）分別升7%及10%、信達國際（00111）升26%；國泰君安（01788）及海通國際（00665）各升5%及2%。

呢幾隻都係內地券商在港的旗艦，主營香港及海外業務，日後可憑着本身在港的基礎，配以母公司在內地A股的業務優勢，發展前景大為提升，帶動估值上升。反觀三家主力做A股業務的內地券商──中信証券（06030）、海通證券（06837）及銀河證券（06881）升幅相對溫和。

光控睇位再上車

有別於香港H股，參與買賣的八成都係機構投資者，A股八成買賣都係散戶投資者參與，可以話剛剛相反。正因如此，過去A股好多消息滿天飛的垃圾股可以炒到變鑽石價，但價值型的重磅股估值卻不及H股。在滬港通實施後，兩地市場趨向融合係必然的大趨勢，A股可藉此吸引更多機構投資者參與，H股/港股通股份則可能多咗唔少A股投資者參與。

同係散戶，內地「清兵」「狠喪」得多，到時會出現甚麼局面，就放長雙眼等着瞧。另一角度睇，本港投資者宜快快惡補A股知識，因為未來真正好玩的淘金地，係A股而唔係港股﹗

中資金融股中，尋日表現最勇猛的係光大控股（00165），高見14.78元，收報14.26元，升7%，都算係光証烏龍盤事件以來最漂亮的一仗！光控將於八月二十七日宣布中績，但相信股價做好非關中績表現，主要係估值一直落後於同業，加上母公司重組方案獲批，光控有機會獲得注資。只是，走勢上，呢浪升到上15元樓上點都要抖下氣，若冇平貨在手，宜等調整出現再睇位上車。

六月下旬，本欄曾以「大有作為」評價中信証券，至今股價累升了兩成，已升抵大型上落區頂部接近20元的水平，長線股價肯定不止於此，但中短線則不妨候調整出現再作部署。呢一刻中短線也許海通證券更值博，一來晒士唔差得幾多，但現價中信証券市帳率接近2倍，往績市盈率32倍，海通證券僅1.5倍，往績市盈率24倍，估值上相對落後。

再講，近兩年海通證券盈利增速勝中信証券，尤其在創新業務方面表現領跑同業，吸引力絕不遜色，計劃在13元樓下分注進場。