甲級商廈市況呆滯一段時間，近排受滬港通效應帶動，谷番起個勢。上月港島甲級寫字樓買賣回升，全區料至少錄6宗商廈成交，按月升一倍，等同第二季總交投量。據聞部分單位由內地企業等購入，早前以逾1億元賣出嘅灣仔會展廣場辦公大樓單位，市傳買家係內地企業。由於市況勢頭唔錯，市場料年底前港島區甲廈做價或有8至10%升幅。

會展廣場辦公大樓一個高層戶，上月以逾億元沽出。（資料圖片）

滬港通效應下，信德中心西翼上月連錄買賣成交。（資料圖片）

七月份部分港島甲級寫字樓買賣成交個案

今年首七個月，估計港島區有約21宗甲級商廈買賣成交，單係七月份就佔6宗，係今年單月最多。自五月份開始，區內甲級商廈交投已經連升三個月。

據聞，近排市場有一批中資公司搵緊盤，好似會展廣場辦公大樓一個高層單位，面積近3,500方呎，上個月賣咗逾1億元，呎價約2.89萬元。市傳買家係內地企業等，今次買入唔知係唔係同滬港通有關。早排該廈一個低層01室連約細單位，成交價近7,000萬元，呎價約2.5萬元，買家亦傳係內地公司。

內企問盤個案增加

美聯工商舖（00459）商業部港島區營業董事羅仲英話，近排內地企業查詢港島甲級寫字樓買賣嘅個案增加咗。

受惠滬港通效應，有部分用家同投資者都趁依家商廈做價落後而加快吸納，所以令到最近成交量增多，其中上環信德中心上個月就連錄成交。

信德西翼連錄買賣

綜合市場資訊，信德中心西翼七月份估計錄得至少約4宗買賣成交，成交呎價介乎1.7萬至近2.5萬元，其中一個面積約3,600方呎中層單位，以8,935萬元賣出，呎價約2.48萬元。

另一幢指標甲級寫字樓金鐘力寶中心2座，七月份都錄得一宗成交，賣出嘅低層單位，面積逾2,200方呎，成交價逾3,842萬元，呎價約1.73萬元。

羅仲英又話，工廈同舖位先後被炒上，寫字樓價格相對落後，隨着滬港通在九至十月會有更明確嘅消息，長線看好甲級商廈未來走勢。估計到年底，港島區甲級商廈樓價或會有8至10%升幅。