Fundman睇市：李寧難逃一跌

李寧發盈警預告中期虧損擴大，今日股價恐怕將面對沉重沽壓。（資料圖片）

最近有位相識多年的基金朋友，離開多年來的工作崗位及高薪厚職，選擇趁年輕重返校園，以及騰多點時間與家人共享天倫。老友投資成績向來標青，仍有如此選擇，主要係睇近十幾年大批中資企業嚟到香港魚缸上市之後，股市開始變質，投資者從以往看重企業管治優劣、行業前景，漸漸變到今時今日無論任何中資企業，在微觀分析前，更重要係賭國策風向、炒中國經濟周期，結果新一代基金經理愈來愈似倒模咁一式一樣，老一派喜歡挑戰如老友者，直言再無留戀香港魚缸之處。筆者佩服老友之灑脫外，亦都心有同感。

太陽日誌

美銀美林預測李寧業績

美股畀耶倫嚇一嚇之後，前晚經已拗腰回升，恐慌指數更跌落12.56，向住上月造出的七年新低11.27進發。華爾街投資者當無事發生，依然歌舞昇平，但港股卻是依然故我，滬綜指拖住中資股後腿，港股跌2點，收報23,520點，國企指數仲悶，在10,500點水平頂到實已差不多個半月。

濠賭股盈測下調

藍籌股焦點金沙（01928），第二季因為跟澳門街大隊，開始畀伙記14個月花紅，加埋世界盃期間VIP房靜英英，EBIDTA唔及分析員預期，股價插低1.2%，拖埋銀娛（00027）一齊跌，尋日見多份報告因為咁，調低今明兩年的EBIDTA預測1至2%，甚至輕輕調低佢目標價，但就無幾多個分析員夠膽唔畀佢買入評級，個個睇住佢氹仔個Parisian項目兩年後完成，又可以賺進更多人仔。

陸續見內地樓市數據出籠，六月底止，全國商品房銷售金額及面積，分別按年跌6.7%及6%，但經歷四、五月的低潮期的房企，六月份銷售有好轉迹象，三十間主要發展商銷售額平均按年錄得24.9%升幅。值得留意，上半年內房企業的平均銷售面積按年升31.9%，銷售均價卻跌5.4%，簡單啲講，是減價促銷的成果。

上市內房股之中，舊年得兩間未能達成全年銷售目標，而今年上半年內房平均目標完成度不足四成，下半年到底用用減價促銷去達成全年銷售目標，抑或索性任由目標落空甚至提出預警，內房捧場客要跟貼消息。