係人都知依家要喺香港買樓，實在相當艱難，就嚟連搵個租盤都一樣咁難。香港置業高級執行董事伍創業同劉Sir講，佢公司最新嘅調查揀咗21個大型私人屋苑嚟做分析，加埋咁多個屋苑有成9.7萬個單位，但計晒都只係得480個租盤放緊，反映市場都開始現租盤荒嘅情況。其中，將軍澳中心受惠內地生嚟香港升學，一個月間租盤少咗成37%，帶動租金叫價上揚16%。

香港置業伍創業（左）表示，內地學生搶租盤，令大型屋苑租盤「鬧荒」情況加劇。

淘大花園現時有五個租盤。（資料圖片）

主要屋苑租務放盤以及租金變幅

受租盤持續減少影響，伍創業話，依家唔少大型屋苑待租盤源真係少到得人驚，由5至70個不等，比起六月同期少咗5至37%，帶動個別屋苑租金叫價一個月間都升咗5至16%。

重災區係鄰近大學嘅東九龍，好似將軍澳區，指標屋苑將軍澳中心同蔚藍灣畔，租金叫價一個月間分別升咗16%同10%；而租務放盤量，以將軍澳中心為例，跌咗足足37%，以成個屋苑有超過4,500伙計，只係得17個租盤放緊。

至於同樣吸引內地生搶租嘅大圍名城同埋鑽石山星河明居，租金一個月同樣升咗15%。

淘大租盤只得5個

最誇張嘅東九龍，九龍灣淘大花園近4,900個單位，現時市場只得5個租盤放緊，比起六月份再跌一成，都咪話唔恐怖。佢哋公司行政總裁李志成就話，其實加辣招推出後，呢兩年住宅租金係咁升，已經連續兩年月租喺1萬元或以下嘅租務成交個案，唔夠兩成。

今年最新數據更加只得18%，所以睇嚟租金繼續會升係不爭事實，展望下半租金會再升超過5%，好大機會再挑戰今年三月嘅歷史新高，再創新高。

港島租金彈升2.3%

利嘉閣研究部主管周滿傑都有同樣睇法，佢話六月份全港五十屋苑租金一個月間升咗1.2%，升幅係近十一個月以嚟單月最勁，去到平均每呎近25.5元，租務成交就有約1,000宗，按月升2%，亦都係近九個月租務成交最多。

而三個大區，上月租金全部都有升，港島區升2.3%最勁，其中柴灣杏花邨更升6.4%。