唔經唔覺七月又過咗兩周，恒指波幅得2%，照計未來兩周魚缸出現較大波動的可能性甚高。理論上，資金不斷流入香港，外圍亦見靠穩，港股易升難跌。但問題係，見到近周股市交投偏靜，重磅股亦開始回軟，唔排除好似上個月翻版，即係先跌一跌才在月底抽高結算。眼見愈來愈多二、三線股異動，唔少都係趁炒殼熱潮渾水摸魚，一旦短線來個「快閃」跌浪，呢類股可能回得好快，故跟炒者宜打醒十二分精神。

阿里巴巴預計八月在美國上市，相關概念股已見蠢蠢欲動。（資料圖片）

內地打貪對房產、零售、奢侈品消費、旅遊等各個行業的影響亦正全面浮現。濠賭股尋日普遍低收，呢期濠江風大雨大，都係做旁觀者最自保。

零售股後市有隱憂

事實上，阿莊聽到在本地旅遊區做零售業的朋友話，今年以來生意額不斷下跌，幾可肯定難以實現全年目標，分紅泡湯，更愁係管理層在制定公司發展計劃時，明年頗大機會會縮減零售點，到時有冇工開亦成疑問。至於本地零售股是否不再值得投資，也許末季傳統旅遊旺季的市道表現，會給投資者一個明確的答案。

本地再有大型新樓盤開售，勢頭不俗。樓市人氣旺盛，地產代理下半年生意勝上半年。咁啱美聯集團（01200）預告上半年虧損會較去年同期減少逾五成，原因之一乃一手住宅銷售交易呈現增長。顯見，呢個表面上係盈警，實際上係半個盈喜，而隨着下半年市況持續改善，相信全年有恢復派息的機會。不過，圍繞美聯一個不明朗因素，乃主要股東之間的紛爭，其實大家都係求財，且看年內能否和氣收場。

今年八月份魚缸亮點，勢必係阿里巴巴登陸美股。踏入本月下旬，又係時候在阿里同騰訊（00700）概念股之中揀定心水等落鑊。尋日見投資咗阿里的中國動向（03818）股價開始熱身，高位見1.63元，收報1.57元，升3.9%，成交超過7,000萬元，若然阿里掛牌表現理想，中國動向股價有機會破頂（52周高位在1.751元），直指2元大關。

其他阿里同QQ概念股中，華南城（01668）同海爾電器（01169）係實力之選，除咗可以趁熱鬧炒概念，本身的核心業務亦省鏡，長揸短炒均可。至於文化中國（01060）同中信21世紀（00241），現階段都係炒概念，風險自然高，但勝在未有估值可依，可以憑空想像炒到無譜，所以都係無謂花時間計合理估值，即市睇實成交小注跟炒仲實際。