昨恒指一逼近23,626點高位，又再擺出一幅拉牛上樹的姿態，收市跌2點，報23,520點，主板成交520億元。即月期指日市收23,493點，成交3.87萬張，較合理值低29點，恒指波幅指數再縮0.13至12.56。

恒指期貨走勢2014/7/17

昨日早市期指見過23,620點全日高位後，午後最低回試23,402點，即市的0.5反彈阻力23,555點，好友午後先後兩次試過反擊，都無功而還，反映超短線淡友的決心是稍勝一籌。當然，昨日的牛皮悶局，未改變筆者對後市緩步向好的睇法，手上好倉繼續咬住等收成。

港股今年大落後，加埋港匯反映大量熱錢湧入，實在無理由唔睇好，但作為揸住期指好倉等運到的好友之一，筆者最擔心係一直唔跟美股升的港股，萬一美股掉頭，佢會跟住跌。

前晚S&P 500 Bullish Percent Index（姑且叫標普五百牛氣指數）升0.4至84.6，反映樂觀情緒主導。過去三年，指數多次在84.4至90.2高位見頂，之後標普會出現短期調整，雖然話牛市莫估頂，但基於美股可能十分接近鐘擺盡頭，使筆者放心不下去買爆個倉。