Fundman睇市：燃氣股強勢未肯停

下星期開始，「三農」及小微企業貸款達到指定比例銀行，可以下調存款準備金率0.5個百分點，等於釋放近千億人民幣的流動性。由放水規模，對措施成為中港股市突破悶局的觸發點，筆者仲係半信半疑，反而認為要留意日本動向。昨日日本公布第三產業活動指數（服務業），由三月的上升2.4%，到四月變成下跌5.4%，遠差過預期的3.5%跌幅。

環球央行開水喉

日本四月開始提高銷售稅，對經濟的衝擊立即浮現，展望周五日本央行議息，為免窒礙復甦勢頭，再開水喉推量寬的可能性不能抹殺，一旦成事，日歐加上緊縮趨勢有見頂迹象的人民銀行，兩間半央行（人行全面放水機會唔大）相繼開水喉，環球股市及資產價格會唔會出現○九年後第二波小陽春，實在值得期待。由近月美債息級級落看來，唔少債商也有類似睇法。

美國又再針對中國光伏產品徵收「雙反」稅，惟暫看消息對光伏股氣氛的打擊有限，其中聯合光伏（00686）股價更連日以大成交上升，一連升穿10日及50日線，昨日收市報0.82元，升7.9%。其他光伏股亦見向好，保利協鑫（03800）升2%，興業太陽能（00750）升1%。

股神睇好能源業

執筆時睇到美國股神巴菲特話，旗下巴郡會加大投資能源業，其中部分資金將押注在可再生能源。事實上，拓展新能源業務，已成為各強國政府的重要任務之一，但國與國之間競爭激烈，保護主義之下，類似光伏產品的貿易糾紛將無日無之。

參考過去做法，若然中國反對下美國堅持徵收雙反稅，中國將考慮以加大補貼協助本土光伏企業。雖然光伏股暫時未見太大波動，但不明朗因素揮之不去，短炒宜注意相關風險，轉身要夠快，免得跑十趟唔夠輸一趟！

中俄簽定三十年供氣協議，由於消息對燃氣股影響要相當時間後先會浮現，本來仲以為燃氣股會趁好消息回一回，點知消息曝光近個三星期，幾隻燃氣股一啲疲態都未見，大孖沙爭崩頭的中燃（00384），現價13.48元，同歷史高位13.64元僅一步之遙，至於潤燃（01193）、港華（01083）及新奧（02688），股價雖然牛皮但跌唔落。

以股論股，中燃手上合約長遠潛力最吸引，但估值相都較高，一四年25.8倍PE，另外三隻則分別係19.4、19.2及21.6倍，短期惟有寄望基金繼續追落後的內銀、電訊股，而從增長股身上減磅，令幾隻燃氣股可以回一回，畀大家低吸機會。