常言道十個牛皮九個淡，近期個市反傳統，成交愈玩愈縮，指數卻由落後的內銀、電訊及地產股撐住在高位徘徊。

恆指期貨走勢

昨日人行擴大定向降準範圍，港股早段居然唔多願升，恒指開23,206點後，曾經倒跌去到23,061點。十點左右，指數先逐漸收復失地，午後破埋23,300點，奠定升局，恒指收23,315點，升198點，主板成交601億元。

而六月期指日市收報23,177點，較合理值有12點溢價，成交多番些少，去到5.5萬張。國指繼續慢牛走勢，收10,518點，升112點，進一步向滬港通後高位10,591點靠攏，國期成交增加至4.87萬張。

恒指波幅指數繼續探底，跌0.35去13.22，反映整體大市嘆慢板的節奏未變。昨日按計劃，開市在10,300點水平開國期好倉，日市收10,344點，只能話好過冇。

表面上國期大低水，但六月國指涉及除息因素，月底要減返180點，故實際只係輕微高水幾點。既然車已上，主觀意願當然想個市繼續慢牛向上，博國指唔使幾耐，跟住恒指個勢，破埋滬港通後高位10,591點後，衝多浸就食胡。