政府推出雙倍印花稅後，無論商業抑或住宅，細價物業都係買家搶購目標。資深投資者林子峰嘅深水埗SoHo WEST西九龍商務中心80個服務式寫字樓，售價30餘萬起，尋日唔使一個鐘就賣晒，套現約1.5億元。另環亞拍賣尋日亦賣咗6項，都係細價物業為主，其中土瓜灣定安大廈銀主盤獲最少5組買家出價競投，搶高約14%至250萬元成交。

深水埗SoHo WEST西九龍商務中心推80個服務式寫字樓單位，現場認購反應熱烈。

SoHo WEST西九龍商務中心是本港首創商舖契的商務中心。(資料圖片)

近期有買家以1250萬元投得何文田爵士花園銀主盤。(資料圖片)

劉Sir知道，SoHo WEST西九龍商務中心係本港首創商舖契嘅商務中心。呢80個服務式寫字樓，實用面積約100至300方呎，售價只係約30零萬元起，而且仲有雙倍印花稅回贈等優惠。

項目一句鐘套現億五

中原（工商舖）黃東雄話，項目認購反應相當熱烈，收到超過400名買家入票，尋晚正式開售，喺一個鐘頭內極速沽清，估計為業主套現約1.5億元。

至於環亞拍賣尋日推咗22項物業，賣咗其中6項，都係細價物業為主。當中3項係銀主盤，成交價由130萬元起。

環亞拍賣曾傑俊話，今次競投氣氛同參與拍賣人數係今年最旺，好似開價220萬元嘅土瓜灣定安大廈高層銀主盤，實用面積約310方呎，吸引最少5組買家出價，最後承價共8口，以約250萬元賣出，高開價約14%。

大嶼山澄碧村搶高41%

另開價148萬元嘅大嶼山澄碧村一個低層戶，就更加搶高約41%，以209萬元售出，物業有至少有4名買家競投，承價多達16口。同場何文田爵士花園第3座高層A室銀主盤同埋佐敦文英樓低層8號室，由一名羅姓買家以1,250萬元及460萬元連環投得，比開價高出約19%及21%。

中原黃良昇話，上月商舖買賣登記有322宗，係近九個月新高。香港置業至尊旺舖林偉文指出，大角咀埃華街70至86號地下H3B同埋H3C號舖，以約7,800萬元賣咗，呎價約23,636元。

據悉，新買家係資深投資者蔡志忠。中原（工商舖）曾自強話，元朗盛發大廈地下入口舖連1樓全層，以1.28億元沽。