樓市出更：舊樓縮退稅期 財團叫好

劉Sir睇到運輸及房屋局向立法會提交嘅文件，講到買家印花稅唔應該窒礙重建，所以原先設有嘅退稅機制，發展商六年內完成重建項目嘅建築工作，就可以申請退稅。而退稅要符合兩大原則，其一係發展商要擁有重建所涉及嘅整個地段，另亦要有證據證明地段係用嚟重建。

政府基於呢兩項原則制訂新嘅退稅機制，包括發展商齊集整個重建地段嘅業權，同時獲屋宇署同意展開重建項目嘅地基工程或批出建築圖則，已經可以申請退稅，發展商最早可提前約莫四至五年申請退稅。

梁志堅：修例後似樣啲

措施推出時，地建會第一個提出反對，認為脫離市場實際運作，揚言發展商或會暫停併購。而該會梁志堅尋日都改口風，話修改條例後「叫似樣啲」，可能有發展商會願意搞吓舊樓收購，但條例要發展商畀咗錢先，收購始終有困難。

有搞開併購嘅發展商反應都幾正面，好似宏安地產黃耀雄話，舊樓收購要畀BSD大大增加發展成本，集團做緊嘅併購項目進展緩慢，如果縮短BSD退稅期，資金流動彈性相應增加，所以贊成建議。

田生地產區永華就覺得，集齊項目90%業權即可申請退稅對發展商會公平啲，仲可以同強拍條例睇齊，但要集合全數業權先可以申請退稅，為咗幾個單位而花多超過一年時間，會對發展商構成資金壓力。

學者：對供應幫助輕微

不過，劉Sir喺立法會文件見到，由於政府認為只持有項目部分業權，好難確定有關收購是用作重建，所以唔接納只持有某個百分比嘅業權就可以退稅。

而學者就覺得縮減退稅期對供應有輕微幫助。浸會大學麥萃才話，BSD原意係針對海外買家而唔係阻礙重建，呢次係優化建議，退稅機制理性少少，多咗誘因讓發展商進行重建，對供應有輕微幫助。