恒指期貨走勢

昨日現貨居然可以高開201點，完全無視假期期間，內地公布差勁的官方製造業PMI。不過，恒指最終是高開低收，由頭殺到落尾，淡友下半年一開局已搶佔先機，造頂兼炮製單日轉向格局，營造短期反彈已經差唔多的氣氛，確係令人不禁佩服到五體投地。

恒指期貨走勢

昨日現貨開市後見全日高位21,004點，剛比23,512至19,426點跌浪的0.382反彈阻力位20,987點高17點，誰不知結果卻係陰燭兼單日轉向，加埋昨日期指成交唔多，得7.06萬張，似乎冚淡倉動力也在減弱，對短線反彈不利。

或者看官會話筆者以20日線（21,043點）作為好倉食胡目標太貪心，結果差些少，捉到鹿唔識脫角，昨日高位近千點帳面利潤無食胡，認真罪大惡極，但既然以日報形式提供心得，筆者也盡量用可以隔晚指示方式操作，今浪低位入市注碼只係平常的三分之一，實行以幅度補償張數不足，訂20,415點止賺，繼續揸住先。