股海實戰：聯想 策略切忌高追

尋日內房同內銀股都受壓，一線內房潤地（01109）跌4.9%、中海（00688）跌2.5%，反而個別內房殼股則熱炒，深科（00106）升幅最大，達22%，其他如積華（02327）升13%、恒力（00169）升3.3%。睇嚟內銀調整放貸政策，唔多唔少影響內房企業融資，A股又未復集資功能，促使更多內房企業選擇來港買殼。

內房殼股尋寶不易

之不過，要估邊隻係下一個殼股對象有難度，好似早前民生國際（00938）大股東話洽售股權，但轉吓頭又話告吹，股價大幅波動，真係唔易玩。

科網股跑贏大市，尋日網龍（00777）及金山（03888）分別升8.2%及5.4%。全球PC市場增長放慢，代之而起嘅係平板電腦同智能手機。聯想（00992）自染藍後股價由高位9.07元反覆回落至6元水平，四至六月低位分別喺6.45元、6.6元及6.65元，尋日反彈受阻於50日線（7.23元）下，並回落至250日線（7.04元）樓下收市，報7元，跌0.4%。

如今全球智能手機市場由兩大品牌蘋果及三星瓜分，聯想欲分一杯羹難度甚高。好在聯想嘅PC業務喺新興市場具優勢，未來數年將靠此支撐大局，以換取時間讓手機及平板電腦業務盡快成長，加上有內地呢個龐大市場作為後盾，兼有國策助其一臂之力（例如成為政府部門首選採購定品牌），加快滲透，前景雖尚不太明朗，但並非毫無把握。

總括而言，未來數年公司有危有機，成功關鍵在於能否做大手機同平板電腦市場。喺見到成績前，估值或會受限制，故入市策略切忌高追。以現價計，一四年度預測市盈率約13倍，暫毋須心急撈底，中長線可待再試6.6元水平承接，始考慮下首注。