太陽日誌

老友問「五窮六絕七翻身」呢個講法點嚟？筆者自問才疏學淺，真係唔知，上網查吓，裏面解釋話三月年結公司在五月份除息高峰期之後，股價每每向下，好息之徒等到暑假前後，新一輪中期息派發時間才再入市，形成五、六月的悶局現象。此解釋合理，但相信並非五、六月跌市的百分百因由，信到佢十足的話，尋日定必上了昂貴一課。港股昨高開低收，早市開21,004點全日高位，半個鐘之後已經倒跌，收市前歐股開局麻麻地，港股隊到接近全日低位收市，報20,658點，跌144點，嚴格來說，做咗個單日轉向的見頂訊號。

太陽日誌

花旗預測中石油業績（人民幣）

反而今浪彈得少的A股，在奇差的PMI公布後不跌反升，借昨日SHIBOR回順，隔夜及一星期息口分別落0.67厘去到3.78厘及4.75厘，幫滬綜指再彈多11點，重上二千關口，收2,006點的接近全日高位，同10日線阻力2,010點一步之遙。

大摩報告唱好電力股，大唐發電（00991）同華電國際（01071）昨日分別逆市升9%及4%。此外，上周發改委宣布調高非民用燃氣價格，投行一致認為中石油（00857）得益最大，結果昨日股價表現亦最標青，高位見8.88元，收報8.8元，升6.6%，成交創年半新高，達27億元，升幅相等於恒指升37點。不過，旗下從事下游業務嘅昆侖能源（00135）則受影響，股價跌6.2%，收報12.9元，都幾閉翳，皆因50日線已跌穿250日線，技術走勢再度轉弱，估計短期尚要反覆尋底，暫不建議溝貨或撈底。

銀基博反彈制唔過

代理五糧液的銀基（00886）公布截至三月底年度勁蝕11.33億，每股輸0.91元（等於股價六成二）！公司解釋，虧損主要係對經銷商進行一次過的白酒回購，同時對應收帳大幅撥備所致。回顧中期業績時，銀基得2.35億生意額，卻有8.8億及12.32億存貨及應收帳，以全年銷售額跌86.9%至3.9億計，即下半年得1.55億，又比上半年再跌34%。三月結時存貨及應收帳分別係12.2億及4.26億，即係比中期時分別多咗38.6%及減少65.4%，其6.68億的減值撇銷，相信主要是經銷商的應收帳款。

習主席打貪之後，茅台及五糧液等酒價急瀉，但端午前後有反彈迹象，可能係尋日股價神奇地拗腰反彈的誘因，但睇見盤數，負債升4.5倍去到9.16億，負債比率升到七成四，加埋銷售額急跌及資產過半是應收帳及存貨，博反彈風險同回報唔成正比。