薛芷倫
Ball后Fanny薛芷倫前晚出席公關好友嘅生日派對，派對舉行地點就係佢有份投資嘅餐廳，Fanny話：「今晚我幫手搞，同埋會做DJ打碟，用電腦Remix啲歌，係我第一次喺朋友面前打碟。我要招呼朋友，今晚好似請咗一百人，已經安排晒啲招牌菜，例如北京烤鴨，有四至五個頭盤、五至六個主菜，仲有甜品同生日蛋糕，有好多嘢食。」咁送乜嘢畀壽星仔？佢話：「驚喜，係扮靚嘅嘢，我哋成日傾扮靚經。」
佢又透露啱啱接受完患癌五年後嘅全身大檢查，佢話：「好開心係Clean嘅，即係我身體完全無晒癌細胞，會放心啲，但係都要食住藥（抗癌藥），醫生話啲藥愈食得耐愈安全，所以我會Keep住食。啲副作用我已經適應咗，副作用係水腫同埋影響女性賀爾蒙會好易攰，但係已經完全康復，好開心。我會更加保重身體，健康飲食，珍惜身邊人，要有正能量。」
咁會唔會都叫囡囡定期body check？佢話：「會，唔止我個女，你哋都要，男男女女都要。依家好番，心目中想搞其他小生意，都係同飲食、扮靚、健康有關。今晚就當係慶祝完全康復。」
第一手消息請下載on.cc東網
