設計圖片及對白
上水嘅幼稚園早前爆發搶位潮，好多家長寧願使少少錢畀留位費，都唔想小朋友無書讀，但最近「留位費」呢個現象，竟蔓延至建制派活動。話說有愛國同鄉會打算喺五月搞場包括撐政改、反佔中嘅盆菜宴，但竟然要每圍參加者交五百元留位費，講明盆菜宴當日要湊夠最少八人先可獲退還全數款項，否則五百元就撥歸慈善用途。咁緊張出席人數，似乎係想「交數」多啲喎，至於向乜嘢人交數，唔使畫公仔畫出腸啦！
活動單張講明參加者要畀五百元留位費。
打正旗號反佔中
呢場萬人盆菜宴打正旗號反佔中，但點解反佔中要搞盆菜宴呢？最搞笑係如果反佔中，咁盆菜宴理應喺中環附近一帶搞，點知佢反其道而行，要殺入新界上水某中學搞，試問喺上水反佔中，同喺港交所抗議佔領華爾街又有乜嘢分別？呢啲咪係九唔搭八囉！
至於要畀留位費，可能同往績有關，事關好多建制派社團活動都鍾意大搞萬人乜乜萬人物物，又話要破世界紀錄等，但呢啲大堆頭活動又經常被踢爆疑似篤數，可能同鄉會怕咗有人臨時甩底，先要人交留位費。
話時話，結婚擺酒都係大排筵席大宴親朋，或者可以效法同鄉會收定人情做留位費，可以避免甩底，而且婚宴當日仲冇得發還添，計落有着數。
第一手消息請下載on.cc東網
