政壇：搞搞政：AV仁亂搞趕客 學聯煞停絕食
白鴿黨上月夥拍工黨搞絕食爭取「真普選」，可惜反響唔似預期，由開始到結束都冇乜人知，加上開會睇艷照嘅「AV仁」何俊仁都參與絕食趕客，搞到「絕食」呢招似乎畀泛民主派做到爛，賤過地底泥，威脅功效成疑。有見及此，近年都會喺銅鑼灣時代廣場外絕食悼念「六四事件」嘅學聯，學生哥為免再亂搞絕食而「臭朵」，今年決定急煞車情願取消絕食。
設計圖片及對白
原來有學聯成員擔心泛民政黨近年郁啲就搞絕食，已經失去原意，亦冇新意，所以無謂再嘥氣捱肚餓。咁學聯仲有乜新招吸引市民眼球、了解六四事件呢？學生們都抓爆頭，好彩今年有剛落成嘅六四紀念館撐住，另會自製兩、三米高「坦克車」向西環進攻。
泛民除咗搞絕食搞到個朵臭晒，一直緊跟真普選聯盟路線、主張三軌提名嘅白鴿黨，原來有意跟隨主張公民提名嘅「公民直接提名必不可少聯盟」約十二個民間團體，提早喺今年七一遊行後佔領中環，此舉亦令包括學聯在內嘅聯席團體非常不解。
有聯席成員質疑，白鴿黨提出嘅三軌提名其實唔需要靠佔中爭取，批評白鴿黨一邊廂冇全力支持公民提名，但一邊廂又提早佔中「抽水」，唔明白鴿黨做事嘅邏輯。白鴿黨胡志偉承認，該黨的確會參與民間七一佔中，但黨內「會有自己一套行動喎」！
