點解近呢十七年來，香港地乜都死呢？主要原因，係由香港廢柴政府高層官員帶頭的一舉一動，一言一語，全無邏輯、不按人類應有的正常本性行事，所作所為，唔係無靈魂的等接柯打，按聖旨炒作，便是揣摩上意的失常胡混；若由佢哋自己揸主意，咁仲更大鑊。

嗱！看看高鐵因延誤而引爆的醜聞，簡直仲臭過大陸個人遊旅客通街放低的幾両。

港鐵主席錢果豐昨日宣布，話鬼佬行政總裁韋達誠明年八月合約期滿便不再續約了！吓！仲畀佢搵食多一年？上星期就應叫佢執包袱返祖家啦！嚴格地說，錢主席也該自動引咎辭職，收皮以謝天下啦！但兩人都係過千萬年薪的呀！仲唔「圍威喂」咩！

另一件，江湖傳聞佢遞信請辭的張炳良局長，昨日又自我澄清，話不理傳言，只想盡快處理好呢單鐵路工程云云！以張局長嘅「演技」，只會叫港人好「驚訝」囉！仲衰唔夠呀！

佢一個大話冚一個大話，當香港人食玻璃大似的！做事低能兒戲，被那個自詡唔講大話的佛教徒李焯芬教授踢爆，當日在一個宴會場合，「有人」（後來「講明」係張局長的人）匆忙地話想請佢幫吓忙，佢話能「幫到就幫」囉！咪答應了！張局長像執到寶咁，公布成立咗「獨立檢討高鐵小組」，並用李教授做主席添！多兒戲呢，點知，唔夠兩粒鐘，畀傳媒查到李教授有利益衝突，香港廢柴政府才「立即」撤回聘任要職，還自嘲係「蝦碌」喎！成件事多醜陋呀！呢啲唔只係「兒戲」、「蝦碌」、「騎呢」、「醜陋」，仲係「核突到無朋友」呀！

老老實實，高鐵醜聞，只是香港特區眾多事務當中的一件碎料而已！往後，陸續有來呀！原因？請看本文第一段……

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps