Fundman睇市：中廣核電基調良好

八月份工業利潤大跌，但A股近日卻跑贏全球股市，3大指數昨分別跌1至2%，史提芬上周初預言滬綜指3,200點會走貨，同樣道理，到3,000點就算冇國家隊托市，亦會有散戶投機性撈底。

長假當前沽定先

今日係十一前A股最後一個交易日，然後放7日長假，滬綜指估計點都會頂住3,000點收市，免得有損「國慶」，但海外投資者可能睇見成個禮拜冇交易風險太大，所以趁呢兩日沽咗先，昨日滬股通亦賣盤超買盤。

現時中國每有重要經濟數據公布，市場已成驚弓之鳥，放完長假後又可能面對連串經濟數據，原來GDP增長7%定義是底線不低過6.5%，似乎先為自己封定後門，第四季有五中全會和中央經濟工作會議兩個大會，過往大會前夕例牌股市做好，現亦傳出將出動「組合拳」救市，放假期間可能先來降準，但若無新招恐怕效果爾爾。

假如今日大吉利是，滬綜指跌穿3,000點，恒指跌穿兩萬點，是否會來一次技術性反彈？正如前文所言，近期陷阱處處，上次恒指跌穿兩萬點已要追溯至一三年七月，半年後個市反彈3,000點；今次恒指累跌8,000點，但22,000點屢試不穿，假設穿20,000博重上21,000並不是奢望，正如滬綜指在3,000至3,200點之間玩上落亦搵到幾餐晏仔，但是否博得過見仁見智。

手持現金最安全係人都識，尤其現在危機四伏，昨重災區是資源礦業股，嘉能可單嘢有機會演變成商品災難，原因公司要賣資產還債，手上咁多商品庫存推出市場咪話唔驚。

立基工程（08369）上市兩日就上天下地。大股東密密增持的輝山（06863）竟鬧出有毒原料風波，就算澄清後亦可能對銷量有影響。唯一一隻強勢股都出現意外，炒股不炒市只是空談，投資者寧願博窩輪及牛熊證，昨衍生工具佔大市總成交接近四成，資金明顯流入牛證，但沽空金額亦增至14%。

中國以前靠低工資已可獨步江湖，從而亦帶動投資和消費，增長具有其必然性，但現時回落也是必然，不計所謂「中產收入陷阱」，出口和投資已走到盡頭，希望靠內需去推動經濟是最大方向，故有股市財富效應谷經濟的妄想。

然而，消費並不單看今日在股市賺多少錢，主要是看對經濟前景的信心，若見經濟蕭條，有錢亦寧願儲起傍身。中國的儲蓄率無疑全球最高，但「磚頭最保值」觀念已根深柢固。

為保七出盡法寶

中國究竟仲有乜符弗「保七」實在成為疑問，但不能放軟手腳，發改委八、九月「密密批」，昨又有逾千億鐵路項目，今時今日仲要靠基建投資可見冇料到。事實上，現時大部分公路有排都未飽和，就算鐵路投資到明年已可能見頂回落。個人意見認為，尚僅餘核電投資仍有空間，原因是自福島三一一事件後已有很大段真空期，而海外國家對核電的興趣亦僅次於高鐵。

有消息話，內陸核電在選址及安全性方面已進行調研，有機會重新啟動。海外項目亦有好消息，本月內中廣核集團同肯尼亞簽約開發核電，中國核工業集團與美國泰拉能源簽署第四代核電開發協議，而英國早前亦宣布中國將建設當地預算超過2,400億元人民幣的核電廠，習主席下月訪問英國，相信將會帶來中英在高鐵或核電進一步合作的好消息。

當然，以上的好消息早前已為核電股帶來一段小陽春，中廣核電力（01816）曾連升四日，但不能否認核電是中國少數基本因素轉好的板塊，中廣核電上半年盈利亦增長36%；受惠於沿海核電重啟，惟核電的建設期及入帳期較長，未來才會逐步反映，集團並期待獲母公司注入核電廠，缺點是估值偏高，但短線卻不乏催化劑。