周初港股破位不成，最後失驚無神急跌389點散場，經過兩日悶局，結算前夕，尋日個市同樣喺無特別利好消息下，反彈331點，收報23,197點，計落同上星期五恒指收市點數23,194點，只差3點。個市chok上chok落，根本就無意思突破六月以來的窄幅悶局。

雖然電動車發展故事動聽，但面對的難題仍不少。（資料圖片）

太陽日誌

車股繼續有追捧，華晨汽車（01114）同寶馬傾延長合資年期外，吉汽（00175）、比亞迪（01211）、東風（00489）走勢都唔錯。尋日有新聞話，中央汽車產業政策研究中心建議向非汽車製造企業，發出兩至三張純電動汽車生產牌照。會唔會對比亞迪帶來好大威脅？睇落機會唔大。

歐日車廠態度審慎

環顧現時環球汽車市場，能夠無車廠背景而以純電車殺出一條血路的，數來數去只得美國Tesla一間。始終，發展電動車依然受限於充電裝置普及性，以及車價是否被消費者接受等客觀因素。君可見汽車強國日本及歐洲眾車廠，推純電動車仲係停留喺試驗性階段，而唔少歐洲消費者都認為柴油車比電動或混燃車環保。事實上，雖說電動車零排放，但充電池生產過程產生污染都唔細，故柴油車在歐洲的發展，一直領先電動車幾十個車位。

如果中國確認多發電動車牌照，橫睇掂睇，得一間汽車零售商萬向集團有條件大展拳腳，事關今年佢響美國收購咗間純電動跑車生產公司Fisker Automotive。但講到尾，電動車發展故事動聽，為比亞迪帶來相當溢價，但事實係內燃機引擎車以及手機配件才是公司最大收入來源。唔想阻人發達，對新經濟充滿幻想，揀比亞迪無妨，不過史提芬心目中的車股心水，始終是華晨、東風比較為正路。

翠華控股（01314）去年賺1.56億元，增長20.4%，業績低過大行平均預測的1.92億元，主因係快速開店的同時，被初期勞工及物業租金開支蠶食了利潤。期內收入升35.9%，比純利20.4%升幅高，主要是純利率由約12.1%降至約10.6%所致。去年度翠華增設9家分店，總數升至41間，公司預計未來三年再倍翻去到超過80間。

翠華接近入貨範圍

去年翠華的員工及租金成本分別升37.8%及37.2%，高於營業額增長，未來三年平均每年開舖13間（39除3），在預期商舖租金見頂下，更勇的開新店其實好處多於壞處。年初至今股價累跌27%，往績市盈率35倍，表面上唔平，但由於分店基數少，加上租金佔收入比例見頂，大行估一五年賺2.45億，打個九折，賺2.2億元，市盈率落番25.3倍，計落翠華已差不多去到可以入貨範圍。