經過兩日半死不活的悶局，期指好友趁結算前一日先出手，恒指高開81點後愈升愈有，最後升331點，收報23,197點，大市成交去番530億元。即月及下月期指，日市收23,192及23,120點，較合理值分別低6點及高37點。

恒指期貨走勢2014/6/26

簡單講，周一無緣無故的下挫，到周二、三呈整固，周四來一個還原基本步，仿似一切無發生過一樣。在缺乏方向兼現貨成交疏落的市況下，期指大戶想開邊瓣就開邊瓣。

今日終於到結算日，真心希望五窮六絕的順口溜成為事實。睇番過去一個月，恒指高位在六月十三日的23,397點，低位是本周一的22,802點，全個月波幅595點，兼且完全無明顯方向，對期指玩家相當致命，好似周一假如博指數跌穿22,950點，技術上可以行多浸，昨日已肯定要扯白旗投降。

同樣地，昨日抽升是否意味短期打破悶局？個人認為不宜倉猝定調，過去五日沽空佔大市成交比例偏低，後市挾淡友的誘因稍嫌不足，指數表面大升超過300點，但事實也只番到六月上旬的大型上落區之間，似乎要追買，仲係等指數確認升穿23,397點收市先好。