魚缸Blogger：勝利管道候回調收集

勝利管道（01080）尋日即市最多狂飆8.5%，可惜以接近全日低位0.48元收市，升幅2.1%，如果短線反彈上唔番10日線0.5元，唔排除仲會下試低位承接，一旦失守250日線0.46元，可以等到回調100日線0.44元支持先再考慮。

勝利管道係中石化集團同中石油集團嘅主要供貨商，雖然公司去年營業額增長33.1%至25.5億元（人民幣．下同），不過純利倒退71.6%至1,782萬元。與同業相比，珠江鋼管（01938）去年少賺86.7%至4,147萬元、天大石油管材（00839）多賺40.5%至4,928萬元，勝利管道嘅成績表唔多靚仔。

不過，預期內地將加快西北（中哈）、東北（中俄）同西南（中緬）三大進口通道建設，隨住中俄已就天然氣東線管道建設達成協議，鋼管行業需求持續增長，去年勝利管道已經開始擴充產能，兼且新增直縫埋弧（LSAW）焊管類型，而前年成立的金屬商品貿易業務初具規模，未來業績有望改善。