期指結算前夕，恒指挾高逾300點，收報23,197點，主板成交525億元。雖然基金半年結唔使等最後一個交易日先做嘢，但睇尋日升市，班大戶亦唔爭在托多一、兩日！展望下半年，中資重磅股打破沉默，重拾主導權的機會存在，主要係十月滬港通將再引發兩地資金大幅流動，配合內地經濟提速發展，照計做上易過做落。

未來一季A股順利重啟IPO，市場恢復融資功能，券商股將成贏家。（資料圖片）

中滔環保表現堅挺

去年九月以招股價1.48元上市的中滔環保（01363），掛牌後股價如放紙鳶，飆到上今年三月高位6.67元始現較大幅調整，惟股價力守4元樓上，整固過後又重現升勢，前日公司停牌，原來係宣布溢價配股集資，復牌後股價靠穩，高位見5.95元，收報5.83元，升0.3%。上市未夠一年就配股集資，兼且係以溢價配股，股價表現都算堅挺。

之不過，宜留意今次公司配股的認購人係旗下一家全資附屬的董事，而集資用作項目建設同減債等內部用途，而非有新收購項目。若然要揀環保水務股，阿莊都係屬意北控水務（00371）或光大國際（00257），皆因憑股東背景及多年往績，在取得新項目方面有優勢，長揸短炒都較具信心。

尋日本港三隻新股首日登場，但竟然玩集體跳水，真係睇見眼冤！反觀內地三隻新股首日掛牌全部上演「秒停秀」，一登場就漲停。無論如何，若未來一季A股順利有序重啟IPO，可消除一項重大不明朗因素。A股市場恢復融資功能，將有助帶動魚缸交投回升，券商股將成贏家！

講到券商股，近日有指中央反腐殺到去證券行，調查重點包括債券銷售等。站在投資者角度，內地金融業有待開發的空間甚巨，眼前反貪腐係好事唔係壞事，即使更大的國際金融機構，都不排除有員工出軌行為，最重要係企業本身有完善的內部管治制度。

阿莊一路睇好券商股，深信在「新國九條」及滬港通之下，行業前景秀麗。若然短期因為與反貪腐相關消息引發板塊震盪，反而為實力投資者提供上車機會。類似中信証券（06030）這類央企背景大型券商股，中長線大有可為。

近日有關旗下分析員操守及券商行業反貪的負面消息，暫對其股價影響有限。回顧過去年多其股價表現，主要波幅介乎15至20元。該股尋日收報16.92元，相等於一四年度預測市盈率21倍，暫可先行觀望，預計七月市況會較波動，屆時或可在15元水平找到上車機會。