Fundman睇市：金飾股 撈底博反彈

本地四月零售數據因為珠寶金飾銷售急跌而錄得9.8%跌幅，但昨日本地零售股走勢冷靜，只有炒味極濃的米蘭站（01150）跌7.6%，其他如周生生（00116）、六福（00590）都只係微跌1%及0.5%，周大福（01929）更倒升2.5%，珠寶首飾股經過今年初的跌浪，似乎低廉的估值已經吸引到一些捧場客博反彈。

快餐股穩陣可吼

內地旅客消費見頂，其實對本地零售業都不是沒有好處，當然所指並不包括主打遊客生意的公司，而是過去幾年租金狂升的日子不復再，租客議價空間一旦增加，可以預期像大家樂（00341）、大快活（00052）、翠華（01314）、CEC（00759）旗下阿信屋等連鎖零售及餐飲服務提供者，會有更有利條件控制未來租金成本。而自問穩陣的筆者，認為最先應該睇番兩隻估值較低的大字頭快餐股。

遊客減少，最不受影響的包租公，應該是主打屋邨商場的領匯（00823）。截至三月底止物業收入淨額升12.7%，至52億元，可分派收入38.3億元，升14.3%。資產負債比率降至11%，同REIT code限制的45%有相當遠距離，意味就算唔計賣掉四個商場套現的12億元，領匯如果肯提升債務至貼近上限，最多可以進行300億至350億元的收購。現價往績回報3.91厘，筆者估計短期有一成左右上升空間。

買樓自住無問題

煤氣（00003）股東會上，四叔再一次話買樓收租不如買股票。講開買樓，朋友之中有樓無樓各半，眼見金融海嘯後，香港樓價愈升愈有，無樓的一批，近年愈睇愈有反資本主義傾向，個個唔係想再一次爆發金融海嘯、沙士疫症，就係深信美國退市，香港樓價兩年要跌五成。

有趣嘅係，上述朋友唔單止有財力未厚的年輕人，更多是投資銀行及私人銀行家，千萬年薪，情願每月花十萬八萬租樓，嚷着要等樓價爆煲至買。九十年代筆者投身社會，見識過九七、經歷過沙士時淘大花園80萬賤賣，老實講，有朝一日如果樓市真係崩塌，筆者敢寫包單，呢批朋友一樣唔會買。

如果聽真啲，四叔係話買股票好過買樓收租，唔係「買樓自住」。咪話筆者古板，衣食住行是生活基本需要，負擔得起其實買樓係一啲問題都無，至少大家唔可能買幾手恒地（00012）搬入去住，銀行亦唔會用低至按揭利率借錢畀你買股票。第一層樓係market neutral，有能力買第二層先至真係投資樓市，到時先去煩買樓、買地產股抑或REITs吧。