政府減辣後，二手交投旺番唔少，連業主住緊嘅單位，都好少理，有價就賣，博換樓。馬鞍山屋苑今個月已有22宗買賣，90%成交都係業主自己住緊嘅單位；將軍澳二手交投愈升愈有，今個月首四日都錄得30宗，超過66%係自住單位；荔枝角美孚新邨6宗買賣全屬自住單位，反映換樓潮殺到。

荔枝角美孚新邨本月成交全數為自住業主沽貨個案。 （資料圖片）

美聯物業布少明（左）表示，雖然DSD微調，但仍預期今年樓價會跌約5至10%。右為劉嘉輝。

DSD鬆綁後，你計劃何時換樓?

世紀21奇豐梁榮貴同劉Sir講，減辣之後馬鞍山交投多番，上個月有成150宗買賣，而今個月已經有22宗，佔90%成交係業主仲住緊嘅單位。

美孚6成交全數自住

其實樓價升番，難怪業主趁機出貨換樓，好似海濤居3座高層B室，業主自住單位，實用面積約644方呎，賣咗705萬元，同類單位樓價未穿過七百萬元。

美聯羅敬業都話，將軍澳上個月已經有318宗買賣，今個月有30宗，逾66%成交係業主自用單位，減辣之後業主都想換樓，齊齊出貨。香港置業余柏話，美孚新邨今個月6宗買賣，全部業主都住緊，有8期百老滙街108號高層「凹海」單位，連車位賣1,402萬元，實用呎價約1.05萬元。

祥益林偉光話，屯門嘅主要屋苑，過去一個星期嘅成交，有30%係三房單位，反映市場換樓增。美聯布少明話，一項調查發現，有51%受訪業主會考慮換樓，而計劃未來一年內換樓則高達61%，當中約14%計劃三個月內換樓。

代理人數首見回升

成交多番，代理歸隊。地監局截至五月底數字，地產代理持牌人數達35,443人，按月多咗66人，升幅0.2%，為連跌一年後首見回升，但同舊年四月高位比仍然相差1,700人。

土地註冊處數字顯示，五月樓宇買賣合約連升三個月至近6,800宗，涉及金額395億元，比四月分別升13%同近10%。

住宅買賣就升約10%，去到5,200幾宗，金額就唔夠320億元。利嘉閣話，50指標屋苑上個月有977宗買賣，比四月份多咗11%。