筆者昨日話大市破位，破得嚟無半點氣勢，果然升穿23,224點，得一日貨仔就走番轉頭。昨日恒指跌139點，收報23,151點，大市主板成交得481億元。

恒指期貨走勢

昨日六月期指開市早段見23,128點高位，之後全日主旋律仲係搵即市支持，周二早段22,975點，算係好友防守據點，昨日午後期指三次去到22,967、22,972及22,969點回頭，儘管沽壓唔算大，好友也缺乏反攻的意志，反彈去到23,015點已經行人止步，午後期指得48點波幅。

「定向降準」的消息令港股升得一日，內地投資者更加唔buy，滬綜指連跌兩日，昨收報2,024點，2,050點阻力始終無法突破，昨日輸百多點，仍先將周二的三分一注好倉止蝕。

破位唔行，反映個市仲未脫離上落市格局。踏入六月，世界盃開波只怕到時港股會更靜局，諗過再沽六月馬鞍式恒指認購認沽期權博賺期權金，但睇見恒指波幅指數低企，期權縮「窩」的情況都幾嚴重，23,200點套裝價只係得640點，賭到月尾似乎唔算值博，決定一動不如一靜，睇多兩日至算。