Fundman睇市：內銀股 強勢告終

史提芬個人認為，短期小升可以，狂升機會不大。經濟學有個邊際效用遞減法則，熱度好難及得上對上一次，何況中國經濟同股市氣氛，跟○七年相比已不可同日而語，淨係睇滬綜指，只得當年6,124點高峰的三分之一。

春江鴨早着先鞭

上星期中資股做好，人行隨即澄清無放水計劃，周初美股大插插，但港股不為所動照升如儀，到周三，港股沽空佔大市成交比例由10.8%收縮去到8.7%的一個月新低，做淡大戶突然鳥獸散，港股強得有點莫名其妙，春江鴨果然早着先鞭，話今次消息冚得密，筆者打死都唔信。

按暫時公布的細節，內地股民將來可以買滬港雙邊掛牌國企、藍籌以及恒生大型及中型股指數成分股，合共266隻股份。

由昨日的即時反應，第一波受惠者，係連銀行篤機黨都唔會猶豫掃貨的AH折讓股，最大折讓的四隻H股浙江世寶（01057）、山東墨龍（00568）、洛陽玻璃（01108）以及東北電氣（00042），昨日升幅介乎36%至64%，但其實四隻股票中，只得洛玻有喺滬港兩地掛牌，其他三隻恐怕要等「深港通」開車。當然，尋日所見股民係唔理三七廿一，總之上車至算。另外受惠的，係A股無上市，經「滬港通」先至可以投資的騰訊（00700）及幾隻在恒指及大型股指數內的濠賭股，尋日都掃到甩轆。

另外留意到，恒指中型股指數163隻成分股中，113隻升44隻跌，升跌比例2.56：1，較恒指及恒指大型股指數成分股的1.77：1及1.6：1，升勢來得更全面，醒目錢似乎認定，將來中型股會比依家已有QDII長期捧場的藍籌及大型股，有更強吸引人仔能力。

出口數據差到極

個個焦點落在「滬港通」，差到極的中國三月出口數據變成無人理。上月中國出口跌6.6%，差過分析員估計的4%跌幅，進口需跌幅更達11.3%，同街外估跌2.4%差一大截！總結第一季出口跌3.4%，下周三公布的第一季GDP，低過中央目標7.5%恐怕已無懸念。

尋日，中國銀監會副主席閻慶民喺博鰲論壇上提出警示，指內地經濟整合淘汰落後產能，今年銀行業不良貸款難免會反彈，今次是三月中銀監發出關於不良貸款防控系列文件後，又一次官方直接發出預警。

據內地網站數據，中港兩地上市的十二間內銀，去年新增不良貸款大約1,000億元人民幣，一四年頭兩個月新增不良貸款已達600億元人民幣，加埋依家四大行H股又比A股貴4至9%，無AH差價可以炒，基金反而有沽H買A的誘因，只怕三月下旬開始優於大市的表現，會暫告一段落。