昨日早市內地公布三月出口數據令市場大失所望，滿以為港股難逃一跌，殊不知中央又送禮，港股即刻食咗興奮劑一樣，由最多跌109點逐步收復失地，午後挾炒AH股折讓收窄，在藍籌及中型股帶動下，恒指收市報23,186點，升343點。

恒指期貨走勢2014/4/10

昨日提過，周三港股沽空佔大市成交比例，突然大幅減少至8.7%，淡友在大市未破雙頂，可升可跌下居然選擇鳴金收兵，果然是春江水暖鴨先知。

港股昨日以過千億元成交破22,986點上落通道頂部，符合昨日破位追買的計劃，主板成交1,069億元，足足比前日多五成，升勢有足夠理據支持。

即使期指日市亦由過去幾日貼水轉炒89點高水，收23,275點，是四月期指日市交易時段高水幅度最多，反映基金經理唔少未能在現貨市場買到足夠股份，選擇以期指長倉作套戥。

大市已破了W形的頸線22,986點，今次直通車會唔會如○七年一樣狂升萬點？在下唔係先知，踏實點，以21,137點低位起步升破22,986點計，1.236及1.382的目標分別位於23,423點及23,693點，先摸住石頭過河，以此目標分段食胡。