美國女星姬絲汀史釗活（Kristen Stewart）不時被狠批演技，加上偷食事件後形象插水，事業愛情受盡考驗的她直至近期再捱出頭，還自爆剛寫畢一部引以為傲的短片，打算進軍做導演！
記：記者 姬：姬絲汀史釗活
記：講到成名作《吸血新世紀》毀譽參半，你有何感受？
姬：我完全明白每一個想鬧爆《吸血新世紀》嘅人想講咩，但我到今日仍然好X為呢個系列而驕傲，對佢嘅記憶到依家仍然美好。
記：你片約不斷，會否愈來愈愛演戲？
姬：哈哈！其實我好鍾意拍戲嘅感覺，就好似坐喺片場諗：「唉……仲有4個鐘先放工，而且仲有幾個月先可以做計劃好嘅事。」
親自寫短片儲經驗
記：你對女權主義有甚麼想法？
姬：我覺得有部分與我同齡嘅女仔依家都唔太願意講女權，好似「我的確係個女權主義者，亦相信男女平等」等等嘅對白，因為感覺就好似好有攻擊性同好強勢咁，好似講女權就係反男人咁，佢哋好似唔明其實撐女權並唔等如一個特定嘅方式。
記：事業上會有甚麼計劃？
姬：我最近親自寫咗一部非常引以為傲嘅短片，主要用抽象手法而非一般敍述，而感覺就好似詩一樣，內容與水有關。雖然有人問我點解唔執導拍長片，但就我想慢慢試吓先，儲吓經驗！
記：現時有寫作嗎？
姬：我正為好友嘅婚禮創作緊一首詩，完全榨乾咗我！我想建立多一點點自信，因為我所有創作都由個腦而嚟，所以我畫咗一啲畫，亦希望搵到一個劇組，想開拍一套屬於自己嘅電影，需要搵到拍檔仲有監製。
學識同傳媒打交道
記：你於傳媒筆下的形象麻麻，不時被拍到發火舉中指，為甚麼？
姬：我冇講過大家誤解我嘅形象，但傳媒講到我好似對事業成就毫不在乎，我就好想澄清，我的確好關顧自己嘅事業發展，係因為唔鍾意成為大眾嘅焦點先會咁Cool同發脾氣！
記：可以講一講你與傳媒現時的關係嗎？
姬：我依家已經完全變晒，融洽好多！其實同佢哋作風對錯無關，只係我以前唔容易表達自己，感覺不知所措，現時我大個咗又多咗經驗，與傳媒溝通時亦比較自在，做到以前覺得不可能嘅事。
密密做證明實力
自大前年爆出偷食事件後一沉百踩的姬絲汀，憑與茱麗葉庇洛仙（Juliette Binoche）合作的《坐看雲起時》（Clouds of Sils Maria）再捱出頭，更成為首位膺法國凱撒獎（Cesar Awards）最佳女配角的美國女星，揚威海外，總算洗甩霉氣！近日被問到年少成名的她亦自言幸運，一出道便拍住茱迪科士打（Jodie Foster）出演《房不勝防》（Panic Room），而父母為演員的她從小就對電影着迷，自爆曾有目標成為最年輕的導演，目標明確！
Kristen Jaymes Stewart
出生地：美國洛杉磯
出生日期：1990年4月9日（24歲）
代表作：《吸血新世紀》、《白雪公主之魔幻歷險記》、《坐看雲起時》等
情史：Michael Angarano、羅拔柏迪臣、Rupert Sanders、Alicia Cargile等
外娛組
