影星陳靜（DaDa）及溫超於新片擔當不同崗位，演明星的DaDa愛情至上，與霉爆經理人王祖藍發展地下情，純情與激情戲皆有，現實中的她則比較理智。至於扮周星馳聲音出神入化的溫超則重演星爺多個經典造型，令觀眾笑爆嘴！
屢拍笑片的DaDa與溫超合作再放笑彈，齊望新片取得佳績。
溫超言行舉止均輕易惹人發笑，絕對是個喜劇人才。
與祖藍發展地下情的DaDa不乏性感演出。
於搞笑新片《吉星高照2015》飾演明星的DaDa，與青梅竹馬的經理人王祖藍譜出一段浪漫又搞笑的地下戀曲。被譽為聲音最似星爺的溫超則飾演星迷，獲祖藍提攜闖影圈，導演更為他度身訂造、重演星爺《少林足球》、《賭聖》、《喜劇之王》及《功夫》等經典Look，扮嘢天分令人讚嘆！
爆李亞男「監場」
近年DaDa大多夥拍杜汶澤拍喜劇，今次則與另一搞笑高手祖藍合作，她指感覺完全不同：「我相信經過阿澤後，冇人係搞唔掂，因為佢會突然考你，令你要不停思考，祖藍就好顧全大局，屬於思考型唔太出聲，會諗好多設計，一埋位就好搞笑！（最難忘同祖藍邊場戲？）有場係回憶嘅電車初戀戲，拍出嚟好有MV感覺，係我第一次搭電車，好得意！」她透露祖藍另一半李亞男經常探班，非常Sweet！問到會否羨慕？她笑說：「戲入面我就戀愛大過天，唔理媽咪反對搞地下情，呢樣嘢同我最唔同，我比較理智，過咗恨拍拖階段，有當然更加好，但冇得強求，一個人都好自由自在！」
Ella通宵跳跳紮
由廣州來港發展多年的溫超，終吐氣揚眉在《吉》片孭重飛，他坦言壓力不少，故向祖藍及曾志偉偷師：「呢套戲係我人生里程碑，無論成功與否對我都好重要！」問到再扮星爺是否冇難度？他說：「都唔係！我哋唔想100%抄，希望拎到個神髓，亦有自己特色，唔容易拿捏。」與台灣組合S.H.E成員Ella（陳嘉樺）演一對的溫超，大讚Ella親切冇架子，且能量超強，拍通宵戲仍跳跳紮放笑彈！
立影
