Nicole於澳洲沙灘大解放，又羨慕當地人的弗爆身形。
藝人梁麗翹早前到澳洲見「偶像」，當被逾千隻企鵝包圍時頗為激動，笑言猶如「見到百幾個都敏俊」一樣！她更穿三點式晒Body，惟眼見途人個個六舊腹肌，令她下決心減肥，但轉個頭卻在大擦生蠔。
情迷企鵝的Nicole聽「正義朋友」話齋睇唔影。
忙裏偷閒的Nicole到澳洲追「星」兼追風，玩個不亦樂乎！
食指大動的Nicole大歎超抵生蠔。
梁麗翹（Nicole）年初偕友人遠赴澳洲度假十天，幾乎日日在當地享受陽光與海灘，並穿上比堅尼大晒弗爆身材，簡直開心到彈起！Nicole表示香港沙灘人多擠迫，亦不好意思當眾騷身材，但勢估唔到澳洲人的身形弗到漏：「諗住嗰邊冇人識，冇人話我肥定瘦，但好Surprise，外國人通常好豐滿，但澳洲人超Fit，嗰邊好多人跑步，個個都六舊腹肌，我都要畀心機！」
漏夜追賞企鵝
話口未完，Nicole便自爆在魚市場鯨吞抵到爛的生蠔：「啲生蠔好平，澳元15蚊一打，我一次過食咗超過一打，都驚中鉛毒！」她表示此行未有濕平，主要是看動物親親大自然。由細到大都超愛企鵝的她，夜晚專程揸兩個鐘車去睇企鵝，並興奮地說：「以前見到啲Fans追星喊，今次見到千幾隻野生企鵝，終於明白嗰啲Fans嘅心態，啲企鵝就喺我隔籬，就好似見到百幾個都敏俊咁好震撼、好激動！」
有得睇冇得影
由於企鵝島上嚴禁拍照，遊客紛紛以手機偷拍，心思思想影埋一份的Nicole卻被同行的「正義朋友」勸阻，因而大呻可惜：「朋友見我眼神有異，即刻大嗌『No！Don't Do That！』搞到我都唔好意思影，之後都好唔開心，仲打長途電話畀媽咪怨，話我淨係同個標本合照，但我都明白影相係唔啱嘅！」
影視組
