囡囡「泰」愛玩水任達華曬傷背脊

名模琦琦偕同老公任達華（Simon）及家人，在農曆新年到澳洲及泰國度假兩星期，她透露是次在不少觀光點都遇上狂風暴雨：「我哋去咗墨爾本睇企鵝，中午去到『企鵝島』，先去睇朱古力廠，食咗好多朱古力，黃昏就等企鵝上岸返屋企，點知突然狂風暴雨，搞到成身濕晒！我哋又去咗動物園同主題樂園，帶囡囡同海豚近距離接觸，Simon為咗幫囡囡影相，成個人落咗水，成身濕晒，仲漏低咗個袋冇攞走，好彩搵得番！」一行人其後乘飛機到黃金海岸，起飛時卻遇上打風，幸而旅程未受影響，琦琦大讚黃金海岸風光怡人。