喺前年佔領行動後衍生嘅一批傘後團體，陸續將矛頭指向年底舉行嘅一千二百人特首選舉委員會選舉，其中「傘後基督徒盼望行動」繼早前發起聯署，要求香港基督教協進會懸空十席選委，最新一招係想搞商討日，並點名指佔中發起人戴耀廷有經驗，疑似想拉埋對方落水。仲記得戴耀廷等人搞搞吓商討日，最終演變成持續七十九日嘅佔領行動，莫非杯葛基督教選委一事，搞搞吓商討日都會有佔領元素出現？
「傘後基督徒盼望行動」一批代表尋日同協進會常務委員會主席蘇成溢、總幹事蒲錦昌見面，要求協進會舉行大型商討日，討論懸空基督教十席選委，蒲錦昌稱要等協進會執委會討論後再作決定，「傘後基督徒盼望行動」發起人林子健口講會等埋協進會回應，但佢事前張揚，若然協進會無意搞商討日，佢哋就會自己搞，稍後亦會約見香港聖公會教省秘書長管浩鳴，希望爭取佢哋支持。
第一手消息請下載on.cc東網
