政壇：彭耀佳續撐「甩轆鋒頭」
相信大家仲記得，建制派喺舊年六月政改方案投票時世紀大甩轆，提出「等埋發叔」嘅立法會總商會代表林健鋒，被指要為此承擔一定責任，加上林健鋒任總商會代表超過十年，外界一直盛傳總商會內有聲音想換人，總商會主席彭耀佳尋日出席總商會酒會時開宗明義撐林健鋒，指如對方尋求連任，自己將會支持。
彭耀佳
立法會換屆選舉今年九月舉行，政圈一直關注林健鋒會唔會第四度連任總商會代表，彭耀佳喺選舉前約八個月，指任何人對任何事都有唔同睇法，但林健鋒好努力做商會嘅工作，總商會有好正面嘅評價，商會連同自己都覺得林係好稱職嘅議員。對有傳裕華國貨董事總經理余鵬春有意染指總商會代表，彭指呢啲假設問題就答唔到，如果係真嘅話先講喎。彭耀佳其後談及本港嘅經濟情況，話金融市場開始有大動盪，估計今年經營環境會較困難，而農曆新年後，失業率有機會回升。
