外號「廢鑊」嘅食物及衞生局前局長周一嶽，其平等機會委員會主席三年任期原定喺三月三十一日屆滿，政府早前亦公開招聘下任主席，點知廢鑊被踢爆厚顏報名圖謀連任，消息一出一石激起千重浪，多個團體隨即發起請願力數廢鑊任內十宗罪，聲言「若聘周一嶽，香港就大鑊」。究竟政府會唔會聽取關注團體意見，定繼續優劣不分畀廢鑊連任，料好快會揭盅。
廢鑊早年出任食衞局局長時已劣評如潮，任內醜聞爭議不絕，但一三年竟獲政府「翻閹」出任平機會主席，延續出任高官時嘅惹火作風，包括推動檢討及合併現行四條反歧視條例，又曾公開支持同志平權，其後改革內部架構時疑「肥上瘦下」，通通都係爭議多多。
曾任平機會委員嘅獨立議員謝偉俊早前喺立法會踢爆，廢鑊喺平機會主席遴選名單中榜上有名，廢鑊其後出席活動疑扮「側側膊，唔多覺」，對係咪爭取連任不置可否。之不過關注團體即時連成一線反廢鑊，其中性傾向條例家校關注組二十多人尋日喺政府總部外請願，力數廢鑊任內「僭越權責、挑起矛盾、濫用公帑」等十宗罪，先後向特首辦同政制及內地事務局反映意見。
冀勿優劣不分允連任
團體代表仲即席表演短劇反廢鑊，有人戴上廢鑊肖像嘅面具同黑色手套，手持粉紅色鑊剷烹調一道名為「香城一鑊熟」嘅菜式，材料包括人權、公義、家庭同和諧。團體解釋，粉紅色鑊剷代表同志運動，黑色手套寓意幕後黑手，放喺鑊中煮埋一碟即係顛倒核心價值，香港社會將漸漸變成侵犯人權、不公不義、社會撕裂等，換言之香港會一鑊熟。反廢鑊連任平機會主席嘅行動喺短時間形成，而且訴求清晰，如政府繼續有眼無珠、與民為敵，畀廢鑊續任平機會主席，睇怕只會進一步顯示政府嘅優劣不分。
第一手消息請下載on.cc東網
