Fundman睇市：哈電挑戰雙頂阻力

此前幾次議息，耶倫都以閒置勞動力為由，為加息步伐無市場預期咁快解畫，而今次就賴到落去歐日經濟疲弱身上，一句講晒，都係想繼續透過出口術，在美國本土就業及商貿經濟數據表現強勁下，一方面為加息預期做管理，一方面畀市場信心聯儲局唔會大幅度的讓利率向上。

議息紀錄曝光後，前晚華爾街三大指數急升，道指升1.64%，納指更升1.9%。港股以美股為馬首是瞻，恒指尋日收市升271點，報23,534點，不過主板成交再縮，僅得650億元，唔單止係過去幾日反彈以來最奀，仲係九月十六日以來最少。

二三四線股仔禾雀亂飛，但更明顯見基金開始買番幾隻估值較低指數權重股份，中移（00941）升3.2%，友邦（01299）升2.9%，股市對佔中衝擊經濟的程度開始心裏有數，一度遭拋售的地產及零售股見反彈，長實（00001）、新地（00016）升1.3及2%，本地零售股包浩斯（00483）、利亞零售（00831）、莎莎（00178）、思捷（00330）及Joyce（00647）升幅介乎2至7.3%。

置富產業諗得過

講番息魔，滙控（00005）及吉利汽車（00175）早排發債，一班私人銀行客戶，好似螞蟻見蜜糖一樣，但認購超額太勁，多數得個桔，要去二手市場搶貴貨。由這批被視為半專業到專業的投資者，對定息回報投資極為饑渴，完全無懼美國加息周期殺到，多少見到佢哋同股市玩家睇法之差異。

前晚聯儲局會議內容加埋債息走勢，證實前者確實睇啱市，好息之徒追番幾隻房地產基金，泓富（00808）昨日升2.8%、置富產業（00778）亦升1.4%、領匯（00823）則升1.3%。

舊年本地REITs因為驚加息驚過龍，通通腳軟，今年年頭美債息搶先見頂，REITs年頭升到依家。基本因素，今年香港撇除甲級寫字樓，租金升幅確實欠動力，旺區舖租因為個人遊使錢少咗，壓力較大，但像領匯及置富做公營及私營屋村商場，影響有限，依家預計息率有6厘同4厘，回報仲係吸引，其中置富同八月高位仲有距離，可以諗諗。

設備訂單續回升

十八屆四中全會揭幕進入倒數，維穩氣氛下，A股又創新高。在繼續反貪腐的主題下，除了濠賭股唔多睇好之外，真係一時間無乜idea，市場索性還原基本步，搵番國策股嚟炒，故新能源股尤其核電股尋日表現突出。

其實自日本福島出事，中國核電投資跌到谷底，今年上半年，國家能源局提出陸續恢復核能投資，配合國家防治大氣污染的國策，上海電氣（02727）上半年的核設施訂單新增15.5億元人民幣，較去年同期的7,400萬元人民幣大幅回升，第三季情況延續，有接近7億元人民幣。惟一問題，是核心設施短期佔整體收益比重唔多，心理幫助大於實際，現時接近20倍的預期市盈率，主要源於市場炒核電行業復甦。

而東方電氣（01072）及哈爾濱電氣（01133）都有同樣情況。既然明知純粹短期炒概念，八月中期成績表一出股價撻咗落嚟的哈電，博反彈的條件較好，短期4.5元應見咗底，睇吓今轉可否挑戰5.5元雙頂阻力甚至更高水平。